Тоқаев дін көшбасшыларына жасанды интеллектіні пайдалану жөнінде «қағидалар» әзірлеуді ұсынды

Президент Қасым-Жомарт Тоқаев Әлемдік және дәстүрлі діндер көшбасшыларының VIII съезінде жасанды интеллектті дамытудағы этикалық мәселелерді талқылайтын халықаралық комиссия құруды ұсынды.

Мемлекет басшысы адамзаттың жаңа технологиялық дәуірге қадам басқанын атап өтті.

"Жасанды интеллект, үлкен дерекқор, биоинженерия және басқа да революциялық жаңашылдықтар адамның тұрмыс-тіршілігін түбегейлі өзгертті. Бірақ этикалық нормалар технологиялық прогрестің қарқынына ілесе алмай жатыр. Таңдау құқығы мен жеке өмірдің құпиялығын қорғау, цифрлық теңдікті және жасанды интеллектіні пайдалану қауіпсіздігін қамтамасыз ету секілді көптеген дилемма салдарынан жаңа сын-қатерлер туындады", – деді Мемлекет басшысы.

Оның айтуынша, дін көшбасшылары адамгершілік құндылықтар мен асқақ мұраттардың сақшысы ретінде адамзаттың цифрлық келешегі туралы пікірталасқа атсалысуы қажет. «Кез келген технология адам игілігіне қызмет етуге тиіс. Ол үшін дін көшбасшыларының, ғалымдар мен технократ-инженерлердің тұрақты диалогын ұйымдастыру қажет», – деді Тоқаев.

Президент жасанды интеллекттің Қазақстанның қарқынды дамуына жол ашатынын атап өтті. Дегенмен ол этикалық нормаларды сақтаудың маңызын ерекше еске салып, бұл бағытта кең ынтымақтастық орнатуға дайын екенін айтты.

"Жасанды интеллектіні дамыту этикасы жөніндегі дінаралық комиссия құруды ұсынамын. Ол нейрожелілер мен басқа да серпінді технологияларды жауапкершілікпен пайдаланудың әмбебап қағидаттарын әзірлеумен айналысады. Бұл жерде «алгоритмдерге арналған қағидалар» жинағын әзірлеу туралы сөз болып отыр. Онда адамның қадір-қасиетін құрметтеу, дискриминацияға жол бермеу, аса маңызды шешімдерді бақылауда ұстау мәселелері ескерілуге тиіс", – деп түйіндеді Мемлекет басшысы.