Тоқаев БҰҰ мінберінде: «Қазақстан қақтығыстарды күшпен емес, дипломатия арқылы шешуді құптайды»

Президент Қасым-Жомарт Тоқаев Нью-Йоркте өтіп жатқан БҰҰ Бас Ассамблеясының мерейтойлық 80-ші сессиясының Жалпы дебатында сөз сөйледі. Ол әлемдік қақтығыстарға қатысты Қазақстанның ұстанымын нақтылап, бейбітшілік пен дипломатияға басымдық беруді атап өтті.

Мемлекет басшысы ең алдымен Украина төңірегіндегі дағдарысқа алаңдаушылық білдірді. Оның айтуынша, бұл қақтығыс бейбіт тұрғындарға орасан зор зардап әкеліп, халықаралық сенім мен қауіпсіздікке селкеу түсірді.

«Аталған қақтығысты тоқтату үшін екіжақты және халықаралық деңгейдегі дипломатиялық күш-жігерді жалғастыру қажет. Қос тарап ұзақ мерзімді мүдделеріне сай саяси икемділік танытуы тиіс. Өшпенділік психологиясы қақтығысқа қатысушыларды бітімге емес, құрдымға жетелейді», – деді Тоқаев.

Президент сонымен қатар Газа секторындағы гуманитарлық дағдарыстың ауқымына тоқталды. Ол Қазақстанның әскери іс-қимылды дереу тоқтатуға, бейбіт тұрғындарды қорғауға және гуманитарлық көмектің кедергісіз жетуін қамтамасыз етуге шақыратынын мәлімдеді.

Қасым-Жомарт Тоқаев Қазақстанның халықаралық құқыққа және БҰҰ-ның жетекші рөліне адалдығын тағы бір мәрте атап өтті. Сондай-ақ ол Таяу Шығыстағы бейбіт бастамаларға – Арабтың бейбіт жоспарына, Нью-Йорк декларациясына, Ибраһим келісіміне қолдау білдірді.

Президент Әзербайжан мен Армения арасындағы қарым-қатынасты АҚШ-тың араағайындығымен қалыпқа келтіруді оң тәжірибе ретінде мысалға келтіріп, «көшбасшылық пен саяси ерік болса, кез келген ұзаққа созылған дауды бейбіт жолмен шешуге болады» деді.

«Қазақстан дауды ушықтырғаннан гөрі дипломатияға жүгінуді, күш қолданғаннан гөрі диалог жүргізуді жөн деп санайды», – деп түйіндеді Қасым-Жомарт Тоқаев.