Тоқаев биыл да туған күнін тойламайтын болды

Бүгін – Қазақстан Президенті Қасым-Жомарт Тоқаевтың туған күні. Мемлекет басшысы 71 жасқа толды.

Президенттің кеңесшісі һәм баспасөз хатшысы Берік Уәли Қасым-Жомарт Кемелұлы күндегіше жұмысқа келгенін айтты. Бүгінге ешқандай шара, құттықтау жоспарланбаған.

"Президенттің отбасында туған күнді айырықша өткізу үрдісі жоқ. Бала болсын, ата-ана болсын бұл күнді барынша қарапайым қабылдайды", – деді Берік Уәли.

Қасым-Жомарт Тоқаев 1953 жылы 17 мамырда Алматыда жазушы Кемел Тоқаев пен Алматы шет тілдері педагогикалық институтының қызметкері Тұрар Шабарбаеваның отбасында дүниеге келген.

Мемлекет басшысы Ілияс Есенберлин атындағы №25 гимназияны бітірген. Ол Мәскеу мемлекеттік халықаралық қатынастар институтында (МГИМО) оқып, оны 1975 жылы бітірді.

Тоқаев өз мансабында ҚР Сыртқы істер министрі, ҚР Премьер-министрі, БҰҰ-ның Женевадағы бөлімшесінің бас директоры, ҚР Парламенті Сенатының Төрағасы секілді бірқатар маңызды қызметтерді атқарды.

2019 жылы Нұрсұлтан Назарбаев отставкаға кеткеннен кейін ҚР Президенті қызметіне кірісті және 2022 жылы қайта сайланды.