Тоқаев бірқатар маңызды заңға қол қойды

Мемлекет басшысы Қасым-Жомарт Тоқаев еліміздің түрлі саласын қамтитын бірқатар заңға қол қойды. Құжаттар білім, қорғаныс, әлеуметтік қолдау, жол құрылысы, құқық қорғау, экология, қаржы және инклюзивті тасымал бағыттарын қамтиды.

Эндаумент-қорлар және Арал маңы мәселелері туралы заң

Президент нысаналы капитал қорлары мен эндаумент-қорлардың қызметін құқықтық тұрғыда реттеуді көздейтін заңға қол қойды. Сонымен қатар Арал маңының қазақстандық бөлігіндегі экологиялық қолайсыз аумақтар мәселесі де заңнамаға енгізілді.

Аумақтық қорғаныс туралы заң

Жаңа заң Қазақстандағы аумақтық қорғаныс жүйесінің құқықтық негізін қалыптастырады. Құжатта төтенше жағдайлар кезіндегі халық қауіпсіздігін қамтамасыз ету, қорғаныс күштерін материалдық және әкімшілік тұрғыда қолдау жолдары нақты көрсетілген.

Құқық қорғау органдары мен әскери қызметшілерді әлеуметтік қорғау туралы түзетулер

Заңға сәйкес, құқық қорғау органдары мен арнайы қызмет өкілдерінің әлеуметтік қорғалу деңгейі артады. Жергілікті полиция қызметі таратылып, жаңа жүйе енгізіледі. Сонымен қатар, есірткіге қатысы жоқ техникалық сораны заңды өсіру мен өңдеуге рұқсат берілді.

Үлестік құрылыс, инватакси және жол сапасына қатысты заң өзгерістері

Заң арқылы үлестік құрылыс саласының ашықтығын арттыру, мүгедектігі бар адамдарға инватакси қызметін енгізу және автомобиль жолдарының сапасын арттыру бойынша нақты тетіктер қарастырылды. Жол саласын цифрландыру және жаңа технологияларды енгізуге мүмкіндік беретін құқықтық негіз құрылды.

Қаржы нарығын дамыту және тұтынушы құқықтарын қорғау

Тағы бір заң қаржы нарығының дамуына, қаржылық қызметтер тұтынушыларының құқықтарын қорғауға және артық заңнамалық шектеулерді алып тастауға бағытталған.

Барлық заңдардың толық мәтіні ресми баспасөз беттерінде жарияланады.