Тоқаев бірқатар елдегі елшілерді ауыстырды

Қазақстан Президенті Қасым-Жомарт Тоқаев дипломатиялық корпусқа бірқатар кадрлық өзгеріс енгізді, деп хабарлады Ақорданың баспасөз қызметі.

Мемлекет басшысының жексенбі күнгі жарлықтарымен:

• Жеңіс Асқар Жеңісұлы Қазақстан Республикасының Мысыр Араб Республикасындағы Төтенше және Өкілетті Елшісі болып тағайындалды;
• Батрашев Дәулет Қасекенұлы Хорватия Республикасындағы Қазақстан Республикасының Төтенше және Өкілетті Елшісі болып тағайындалды, ол Португалия Республикасындағы Елші қызметінен босатылды;
• Ғалиев Жан Сержанұлы Португалия Республикасындағы Қазақстан Республикасының Төтенше және Өкілетті Елшісі болып тағайындалды;
• Иордания Хашимит Корольдігіндегі Төтенше және Өкілетті Елші Шалданбай Талғат Рахымқұлұлы Ирак Республикасындағы және Палестина Мемлекетіндегі Төтенше және Өкілетті Елші болып қосымша тағайындалды.

Сонымен қатар Президент жарлықтарымен:

• Лама Шәріп Қайрат Қайырбекұлы Мысыр Араб Республикасындағы және Тунис Республикасындағы Қазақстан Республикасының Төтенше және Өкілетті Елшісі қызметтерінен босатылды;
• Қамалдинов Ақылбек Абсатұлы Хорватия Республикасындағы Қазақстан Республикасының Төтенше және Өкілетті Елшісі қызметінен босатылды.