Тоқаев: Бір палаталы жаңа Парламентте Президент квотасы болмайды

Президент Қасым-Жомарт Тоқаев ауыл әкімдерімен өткен диалог-платформада сөйлеген сөзінде елде құрылатын бір палаталы Парламенттің құрамында Президент квотасы болмайтынын айтты. Мемлекет басшысы бұл бастаманы саяси реформалардың заңды жалғасы деп атап өтті.

«Мен биылғы Жолдауымда бір палаталы Парламент құру туралы бастама көтердім. Бұл – осыған дейінгі саяси өзгерістердің заңды жалғасы. Біз “Күшті Президент – ықпалды Парламент – есеп беретін Үкімет” қағидатын одан әрі орнықтырамыз. Яғни, еліміз Президенттік Республика болып қала береді», – деді Тоқаев.

Президенттің айтуынша, жаңа бастама қоғамда кеңінен талқыланып жатыр, ал Парламенттің құрылымына қатысты түрлі ұсыныстар келіп түскен. Кейбір азамат депутаттардың саны халық санына сай, яғни пропорционалды болуы тиіс деген пікір білдірген.

«Егер осы ұстанымды негізге алсақ, депутаттардың саны 200 адамға жетуі мүмкін. Қазір қос палаталы Парламентте 148 депутат бар. Бірақ менің ойымша, депутат санын көбейту қажет емес. Керісінше, Парламенттің жұмысын оңтайландырып, тиімділігін арттыру керек», – деді Мемлекет басшысы.

Қасым-Жомарт Тоқаев алдағы реформа тек екі палатаны біріктірумен шектелмейтінін атап өтті.

«Бір палаталы жаңа Парламентте Президент квотасы болмайды. Барлық депутаттар бірдей тәртіппен сайлануы тиіс. Бұл – алдағы Парламенттік реформаның аса маңызды қадамы. Мұны халыққа кеңінен түсіндіру қажет», – деді ол.