Тоқаев Бектеновке экономикалық реформаларды жедел реттеу жөнінде тапсырма берді

Бұл туралы ҚР Президентінің баспасөз хатшысы Руслан Желдібай хабарлады.

ҚР Президенті Қасым-Жомарт Тоқаев Премьер-министр Олжас Бектеновке осы аптаның соңына дейін азаматтардың мүддесін ескере отырып, Үкіметтің экономикалық реформалар бағдарламасын іске асыру үдерісін реттеуге бағытталған нақты шаралар әзірлеуді тапсырды.

Мемлекет басшысы шағын және орта бизнесті қолдауға, инвестициялық ахуалды жақсартуға және елдегі экономикалық жағдайды тұрақтандыруға баса мән беруді міндеттеді. Осы бағыттар бойынша Үкімет түзетулер енгізіп, қажетті шешімдер қабылдауы тиіс.

Президенттің пікірінше, Үкіметтің экономикалық саясатының негізгі параметрлері Қазақстанның стратегиялық мүдделеріне сай келеді және жаһандық конъюнктура мен қазіргі нарықтық үрдістер ескерілген.