Тоқаев «Бәйтерек» холдингінің басшысына баспананың қолжетімділігін арттыруды тапсырды

Президент Қасым-Жомарт Тоқаев «Бәйтерек» ұлттық басқарушы холдингінің басқарма төрағасы Рустам Қарағойшинді қабылдады. Кездесуде Мемлекет басшысына бұған дейін берілген тапсырмалардың орындалу барысы мен холдингтің алдағы даму жоспары таныстырылды.

Рустам Қарағойшиннің айтуынша, холдингтің инвестициялық және несие портфелі 14,3 триллион теңгеге жеткен. Жыл соңына қарай бұл көрсеткішті 16,5 триллион теңгеге дейін жеткізу жоспарланып отыр. Сондай-ақ холдингтің жыл сайынғы таза пайдасы 400 миллиард теңгеден асады деп күтіледі.

Оның мәліметінше, 2025 жылдың қорытындысы бойынша холдингтің қолдауымен 77,5 мың отбасы баспанамен қамтамасыз етілген. Оның ішінде тұрғын үй кезегінде тұрған 11,6 мың отбасы бар. Сонымен қатар өткен жылы 77 ірі инвестициялық жоба мен шағын және орта бизнеске арналған 27,4 мың жоба қаржыландырылып, 131 экспорттаушы кәсіпкерге қолдау көрсетілген. Көктемгі дала жұмыстары үшін 7,2 мың ауыл шаруашылығы құрылымы 11,4 мың техникаға лизинг рәсімдеген.

Кездесуде сондай-ақ холдингтің жаңа ұзақмерзімді даму стратегиясы мен импортты алмастыруға, экспортты және инфрақұрылымды дамытуға бағытталған 26 инвестициялық жобаны жүзеге асыру жоспары талқыланды.

Мемлекет басшысы экономиканың тұрақты өсімін қамтамасыз ету үшін ұзақмерзімді инвестиция тартудың маңызын атап өтті. Сонымен қатар шағын және орта бизнесті қолдау тетіктерін күшейтіп, халық үшін баспананың қолжетімділігін арттыру жөнінде бірқатар тапсырма берді.