Тоқаев әйелдерді Халықаралық әйелдер күнімен құттықтады

Президент Қасым-Жомарт Тоқаев қазақстандық әйелдерді 8 наурыз – Халықаралық әйелдер күнімен құттықтады. Мемлекет басшысы бұл мереке нәзік жандыларға деген ерекше құрмет пен ілтипаттың белгісі екенін атап өтті.

Президенттің айтуынша, әйел – сұлулық пен мейірімнің, жасампаздық пен жаңашылдықтың символы. Ол қоғамдағы тұрақтылық пен ізгіліктің бастауында тұрған ерекше күш екенін айтты.

– Әйелдің жаны нәзік болғанымен, болмысы мықты. Олар кез келген қиындықты еңсеріп, даналық пен табандылықтың, жауапкершілік пен батылдықтың үлгісін көрсетіп келеді. Дүниедегі жақсылық атаулының бәрі әйел затынан бастау алады, – делінген құттықтауда.

Мемлекет басшысы әйелдердің ұрпақ тәрбиесіндегі рөлі ерекше екенін атап өтті. Оның айтуынша, аналардың берген тәрбиесі арқылы жастардың дүниетанымы қалыптасып, олар отаншылдық, еңбекқорлық пен білімге құштарлық сияқты қасиеттерді бойына сіңіреді.

Тоқаев қазақ әйелдерінің тарихтағы батырлығы мен парасаты ұлт жадында сақталғанын айтып, бүгінгі таңда да қыз-келіншектер елдің түрлі саласында табысты еңбек етіп жүргенін жеткізді. Олар білім беру, медицина, ғылым, мемлекеттік қызмет, бизнес, өнер, өндіріс және әскери салада ел дамуына үлес қосып келеді.

Президент Қазақстан қазір ауқымды жаңғыру кезеңінен өтіп жатқанын айтты. Оның сөзінше, жаңа Конституция жобасында ана мен баланы қорғау, отбасы институтын нығайту мәселелеріне ерекше назар аударылған.

Мемлекет басшысы әйелдер қауымы алдағы уақытта да адалдығымен, табандылығымен және күш-жігерімен Әділетті әрі өркендеген Қазақстанды құруға белсенді қатысатынына сенім білдірді.

Құттықтау соңында Президент барша әйелдерге зор денсаулық, бақ-береке және табыс тіледі.