Тоқаев: Әйелдер мен балаларды қорғау – маңызды міндеттің бірі

Мемлекет басшысы Қасым-Жомарт Тоқаев әйелдер мен балаларды қорғау – ел алдындағы басты міндеттердің бірі екенін атап өтті.

Президенттің сөзінше, соңғы жылдары отбасылық зорлық-зомбылықпен күрес бағытында батыл қадамдар жасалған. Соның нәтижесінде орташа және ауыр деңгейдегі отбасылық-тұрмыстық қылмыстар саны 30 пайызға азайған.

– Бір жыл бұрын қабылданған заң арқылы отбасылық зорлық-зомбылық үшін берілетін жаза едәуір күшейтілді. Жалпы, соңғы бес жылда әйелдерге қатысты құқық бұзушылықтар екі есе қысқарды. Ең маңыздысы – қоғамда отбасындағы озбырлыққа мүлде төзбеушілік көзқарас қалыптасып келеді, – деді Президент.

Ол сондай-ақ қазіргі таңда «Қазақстан балалары» атты арнайы бағдарлама әзірленіп жатқанын айтты. Құжатта өскелең ұрпақтың мүддесін қорғауға арналған маңызды тетіктер ұсынылмақ.

Мемлекет басшысы нашақорлық пен есірткі бизнесіне қарсы күрес те назарда екенін жеткізді. Биылдың өзінде 83 есірткі зертханасы жойылып, айналымнан алынған есірткі көлемі 84 пайызға артқан. Заң бойынша енді есірткі өндіргендер өмір бойы бас бостандығынан айырылуы мүмкін.