Тоқаев: Астана Иранның ядролық мәселесін шешуге көмектесуге дайын

Қасым-Жомарт Тоқаев Астана Иранның ядролық мәселесін шешуге септігін тигізуге дайын екенін мәлімдеді. Бұл туралы ол 11 мамырда Мауро Виейрамен кездесуде айтты.

Ақорда мәліметінше, тараптар БҰҰ мен оның құрылымдарын реформалау мәселесін талқылаған. Тоқаев Қазақстан мен Бразилия халықаралық қауіпсіздік, ядролық қарусыздану және жаппай қырып-жоятын қаруды таратпау бағытында күш біріктіруі қажет екенін атап өтті.

Кездесуде энергетика, тау-кен металлургиясы, ауыл шаруашылығы, инновация және жасанды интеллект салаларындағы ынтымақтастық мәселелері де сөз болған.

Қазақстан мен Бразилия әлемдегі уран қоры ең көп елдердің алғашқы ондығына кіреді. Екі мемлекет те уранды бейбіт мақсатта пайдаланатынын мәлімдеп келеді.

Қазіргі уақытта АҚШ пен Иран арасындағы келіссөздерде Тегеранның ядролық бағдарламасы негізгі мәселелердің біріне айналған. АҚШ пен Израиль Иран уран байыту арқылы ядролық қару жасауға ұмтылып отыр деп санайды. Ал Иран билігі ядролық бағдарламаның тек бейбіт мақсатқа арналғанын айтып келеді.