Тоқаев Астана әкіміне бірқатар тапсырма берді

Мемлекет басшысы Қасым-Жомарт Тоқаев елорда әкімі Жеңіс Қасымбекті қабылдап, қаладағы әлеуметтік-экономикалық және инфрақұрылымдық даму барысымен танысты.

Әкімнің мәліметінше, Астанада барлық негізгі экономикалық көрсеткіштер бойынша оң динамика сақталуда. Биылғы 7 айда негізгі капиталға салынған инвестиция көлемі 1,2 триллион теңгеге жетіп, өткен жылмен салыстырғанда 42,1 пайызға артқан. Жыл соңына дейін құны 300 миллиард теңгеге жуық 55 инвестициялық жоба жүзеге асырылып, 3,6 мың жаңа жұмыс орны ашылады.

Әлеуметтік салада да ауқымды жұмыстар атқарылуда. «Келешек мектептері» ұлттық жобасы аясында 1 қыркүйекте 28 мың оқушыға арналған 7 жаңа мектеп іске қосылды. Биыл барлығы 15 жаңа мектеп пайдалануға берілмек. Бұған қоса, жыл соңына дейін 4716 студентке арналған 8 жатақхана салынады.

Қаланы абаттандыру және көгалдандыру бағытында 170 аула мен қоғамдық кеңістік жаңартылып, 1 миллионнан аса жасыл желек отырғызу жоспарланып отыр.

Жылыту маусымына дайындық шеңберінде үшінші жылу электр орталығының бірінші кезегі, «Тұран» және «Оңтүстік-Шығыс» газ стансалары іске қосылды. Соның арқасында қала жылу қуатын 30 пайызға ұлғайтып, қосымша 1100 Гкал/сағат өндіре бастады. Биыл «Тұран» стансасының екінші кезегін аяқтау көзделген. Сонымен бірге «Тельман» стансасы салынып жатыр, алдағы уақытта екінші ЖЭО-ны кеңейту және «Оңтүстік-Батыс» газ стансасын жобалау жоспарлануда.

Қасым-Жомарт Тоқаев әкімге бірқатар тапсырма берді. Атап айтқанда, тұрғын үй-коммуналдық шаруашылығы және әлеуметтік нысандарды жылыту маусымына әзірлеу, жаңбыр суына арналған кәріз жүйесін ретке келтіру, жол-көлік инфрақұрылымын жақсарту мен қаланы абаттандыру жұмыстарына ерекше назар аударуды міндеттеді.