Тоқаев Антикор басшысын қабылдады

Мемлекет басшысы Қасым-Жомарт Тоқаев Сыбайлас жемқорлыққа қарсы іс-қимыл агенттігінің төрағасы Асхат Жұмағалиды қабылдап, агенттіктің жұмысы мен алдағы жоспарлары жайында есеп алды.

Асхат Жұмағали агенттіктің 2022 жылдан бері мемлекетке жалпы сомасы 1,12 триллион теңгенің активтері мен қаражатын қайтаруды қамтамасыз еткенін атап өтті. Былтырдың өзінде 486,5 миллиард теңге қайтарылды.

Сыбайлас жемқорлыққа қарсы шаралар нәтижесінде:

• 1641 қылмыс тіркеліп, жүйелі жемқорлықтың 68 фактісі анықталды;
• 1493 адам жауапқа тартылып, 914 адам сотталды, олардың ішінде 229 басшы бар;
• тиімсіз жұмсалуы мүмкін болған 87,7 миллиард теңге қаржы үнемделді.

Президентке агенттік қызметінің маңызды инфрақұрылымдық жобаларға, жол құрылысына, медицина мен әлеуметтік салаларға жүргізілген мониторинг жұмыстары туралы баяндалды.

• 258 жол жобасының ақауларының 95 пайызы түзетілді;
• дәрі-дәрмекке QR-код арқылы тегін қолжетімділік қамтамасыз етілді;
• «Ақшаны бояу» пилоттық жобасы енгізіліп, бюджет қаржысын тиімді басқару жұмысы күшейтілді.

Асхат Жұмағали халықаралық ынтымақтастық нәтижелері туралы да айтты. Әзербайжан, Ресей, Гонконг, Иордания және Қатар елдерінің сыбайлас жемқорлыққа қарсы органдарымен меморандумдар жасалды. Сонымен қатар халықаралық тәжірибені енгізуді көздейтін 2 заң жобасы Мәжіліс қарауына ұсынылды.

Мемлекет басшысы сыбайлас жемқорлықпен күресті одан әрі жалғастыру және осы бағыттағы жұмысты күшейту жөнінде бірқатар тапсырма берді.