Тоқаев Аналар күніне орай анасы туралы әсерлі жазба жариялады

Бүгін, Аналар күніне орай, Мемлекет басшысы Қасым-Жомарт Тоқаев Instagram парақшасында анасы Тұрар Шабарбаева туралы жүрекжарды естелігін бөлісті.

Президент төрт балалы қарапайым отбасында өскенін, анасының бар өмірін отбасына арнағанын жазды. Анасы сол жылдары жас бола тұра, сән-салтанаттан бас тартып, барлық күш-жігерін перзенттерінің тәрбиесіне жұмсаған.

«Бар өмірін перзенттеріне арнап, аналық парызын қысқа ғұмырының ақырына дейін атқарып өтті. Тіпті, қымбат дүниелер алатындай мүмкіндік туған кезде де, өзіне ұнаған заттарды немерелеріне әперумен шектелетін», – деп жазды Президент.

Тоқаев Кеңес Одағы тарағаннан кейін туған еліне қызмет ету жолын таңдауға анасының ықпалы ерекше болғанын атап өтті.

«Сол бір қауырт күнде­рі Мәскеуде қалып, Ресей мемлекетінің Сыртқы істер министрлігінде қызмет істеу немесе елге қайтып оралуды анықтау қажет еді. Сонда анамның «Әкең тірі болса, саған бірден Қазақстанда қызмет ету керек дер еді» деп айтқаны есімде. Бұл сөз бұйрықтай болып естілді», – деп бөлісті Президент.

Тоқаев анасы үнемі қолдап отырғанын да атап өтті.

«Бала күнімнен мен оның көптеген мағынасы терең мазмұнды әңгімелерін, ой-пікірі мен пайымдауларын тыңдап өстім ғой. Әңгімені жақсы айтатын және менің де ықыластана тыңдайтынымды сезген болар, сөйтіп өмірлік дүниетануыма өлшеусіз ықпал етті. Жан-жағыма байыпты қарап, ұстамды болуға, жақсыны үйренуге және одан тек пайдалысын алуға үйретті», – деп жазды ол.

Балаларының әр қадамын бақылап, мектептегі жиналыстардан қалмай, тәрбиесіне жіті мән берген.

«Ол біздің өмірімізбен ғұмыр кешті, ал біз оның өмірінің ажырамас бөлшегі болдық. Аналардың қадірін біліп, оларды ардақтап жүріңіздер», – деп қорытындылады Мемлекет басшысы.