Тоқаев Алматы әкіміне тапсырма берді

Мемлекет басшысы Қасым-Жомарт Тоқаев Алматы қаласының әкімі Дархан Сатыбалдыны қабылдады. Кездесуде қала басшысы Алматының әлеуметтік-экономикалық дамуы, қала құрылысы мен ірі инфрақұрылым жобаларының жүзеге асырылуы жөнінде баяндады.

Әкімнің айтуынша, былтыр қысқа мерзімді экономикалық индикатор 12,8 пайызға артқан. Қала экономикасы есебінен мемлекет бюджетіне 6,6 трлн теңге салық пен міндетті төлемдер түскен. Сондай-ақ Алматыда бірнеше қалалық орталықты дамытуға бағытталған жаңа стратегиялық бастамалар ұсынылды. Бұл тұжырымдама аясында заманауи IT-инфрақұрылым, көпфункционалды іскерлік кешендер және тұрғындардың демалысына арналған абаттандырылған рекреациялық аймақтар салу көзделіп отыр.

Дархан Сатыбалды Мемлекет басшысына Алматының заманауи көлік жүйесін қалыптастыру жоспары туралы да мәлімет берді. Оның айтуынша, жүрдек қоғамдық көлікті дамыту қала тұрғындарының қатынауын жеңілдетіп, орнықты дамудың негізгі факторына айналады. Сонымен қатар Бас жоспарда ауаның еркін айналымын қамтамасыз ету, қаланың жоғары және орталық бөліктеріндегі тығыз құрылысты шектеу, жасыл желек аумағын үш есеге арттырып, 3 800 гектарға дейін ұлғайту қарастырылған. 2025 жылы қала көшелерін жарықтандыру сапасы жақсарып, электр қуаты екі есеге артқаны да атап өтілді.

Кездесуде Алматы тау кластерін дамыту жобасына да ерекше назар аударылды. Қазіргі уақытта «Медеу» базалық станциясы арқылы «Шымбұлақ» пен «Ой-Қарағай» курорттарын біріктіруге арналған техникалық-экономикалық негіздеме әзірлеу жұмыстары аяқталуға жақын. Жоба іске асса, аспалы жолдар саны 16-дан 62-ге дейін көбейіп, тау шаңғысы трассаларының ұзындығы 250 шақырымнан асады, ал демалыс аймақтары тәулігіне 40 мың адамға дейін қабылдай алады.

Кездесу қорытындысында Президент Алматы экономикасын әртараптандыруды жалғастыру, экологиялық жағдайды жақсарту, орнықты көлік пен туристік инфрақұрылымды дамыту, сондай-ақ қала ортасының сапасы мен тұрғындардың өмір сүру деңгейін арттыру жөнінде бірқатар нақты тапсырма берді.