Тоқаев алдағы үш жылға арналған бюджеттің негізгі басымдықтарын белгіледі

Президент Қасым-Жомарт Тоқаев 2027-2029 жылдарға арналған бюджетті жоспарлау кезінде ауруханалар, балаларды оңалту орталықтары, мәдениет және спорт нысандарының құрылысын жеделдетуге басымдық беруді тапсырды. Бұл туралы Ақорда хабарлады.

Мемлекет басшысының төрағалығымен ұлттық экономиканы дамыту және бюджетті жоспарлау мәселелері жөнінде кеңес өтті. Президентке экономиканың қазіргі ахуалы, 2027-2029 жылдарға арналған әлеуметтік-экономикалық даму болжамы және осы кезеңдегі республикалық бюджеттің негізгі көрсеткіштері таныстырылды.

Тоқаев биыл жоспарланған экономикалық өсімге қол жеткізу, сондай-ақ республикалық және жергілікті бюджеттердің теңгерімін қамтамасыз ету қажет екенін атап өтті.

Президент 2027-2029 жылдарға арналған бюджеттің негізгі басымдықтарының бірі ретінде инфрақұрылымдық және әлеуметтік нысандар құрылысын атады. Оның ішінде ауруханалар, балаларды оңалту орталықтары, мәдениет және спорт ғимараттары бар.

Кеңеске Премьер-министр Олжас Бектенов, Президент Әкімшілігінің басшысы Роман Скляр, Ұлттық банк төрағасы Тимур Сүлейменов, Жоғары аудиторлық палата төрағасы Әлихан Смайылов, Премьер-министрдің орынбасары – Ұлттық экономика министрі Серік Жұманғарин, Президенттің экономикалық мәселелер жөніндегі көмекшісі Нұрлан Байбазаров және Қаржы министрі Мәди Тәкиев қатысты.