Тоқаев Абу Дабидің Тақ мұрагерімен кездесті

Астанада Қазақстан Президенті Қасым-Жомарт Тоқаев Абу Дабидің Тақ мұрагері шейх Халед бен Мұхаммед Әл Нахаянмен ресми келіссөз жүргізді.

Мемлекет басшысы мәртебелі мейманды қарсы алып, бұл сапардың екі ел арасындағы ынтымақтастыққа тың серпін беретініне сенім білдірді. Оның айтуынша, Біріккен Араб Әмірліктері – Қазақстанның маңызды стратегиялық серіктестерінің бірі. 2023 жылы тараптар стратегиялық инвестициялық жобаларды іске асыру жөніндегі бірлескен декларацияға қол қойған болатын.

Кездесу барысында Әмірліктердің Қазақстан экономикасындағы ірі шетелдік инвесторлардың қатарында екені айтылды. Былтыр БАӘ-дан келген тікелей инвестиция көлемі екі есеге артып, рекордтық деңгейге жетті.

Сапар аясында 5 миллиард доллар көлеміндегі 20-дан астам коммерциялық келісімге қол қою жоспарланып отыр. Президент бұл келісімдер елдер арасындағы стратегиялық ынтымақтастықты күшейтеді деп атап өтті.

Тақ мұрагері шейх Халед Әл Нахаян Қазақстанға ерекше ықыласпен келетінін айтып, көрсетілген қонақжайлыққа ризашылығын білдірді. Оның сөзінше, екі ел арасындағы қарым-қатынас өзара сенім мен қолдауға негізделген және кең ауқымды бағыттарды қамтиды – энергетикадан бастап цифрлық инфрақұрылым мен білім беру саласына дейін.