Тоқаев Абай күнімен құттықтап, елдегі саяси өзгерістерге тоқталды

Президент Қасым-Жомарт Тоқаев қазақстандықтарды Абай күнімен құттықтап, ұлы ойшылдың мұрасы ұлттық және әлемдік мәдениеттің асыл қазынасында айрықша орын алатынын айтты.

Мемлекет басшысы Абайдың «Толық адам» идеясы әр азаматты рухани кемелденуге үндейтін, өзектілігін жоғалтпайтын терең тұжырым екенін атап өтті. Президенттің сөзінше, ақын халықты білімпаздыққа, еңбекқорлық пен жауапкершілікке шақырып, бірлік пен келісімді сақтаудың маңызын өсиет еткен.

Тоқаев биылғы Абай күні елдегі ауқымды саяси өзгерістермен тұспа-тұс келгеніне де назар аударды. Ол Қазақстанның Халық Конституциясы заңды күшіне еніп, билік институттарын жаңғырту басталғанын және көп ұзамай ел тарихындағы алғашқы Құрылтай сайлауы өтетінін айтты.

«Бір палаталы Парламент реформаларды сапалы әрі тиімді жүзеге асыруға тың серпін беретіні сөзсіз», – деді Президент.

Мемлекет басшысы «Адал Азамат», «Таза Қазақстан», «Заң мен Тәртіп» идеяларын Абай армандаған берекелі қоғамның негізі деп атады.

Президент ұлы ойшылдың мұрасы өскелең ұрпақты отаншылдық пен туған елге сүйіспеншілік рухында тәрбиелеуге алдағы уақытта да рухани азық болатынына сенім білдірді.