Абай облысында жаңа нысан: Қызыл кесік ауылында өрт сөндіру бекеті іске қосылды

Абай облысының Қызылкесік ауылында «Ауыл құтқарушылары» бағдарламасы аясында жаңа өрт сөндіру бекеті ашылды. Маңызды нысанның ашылуына Абай облысының әкімі Берік Уәли мен ҚР Төтенше жағдайлар министрі Шыңғыс Әрінов арнайы қатысты.

Жаңадан құрылған бекет Қызылкесік, Егіндібұлақ және Үштөбе ауылдарының, сондай-ақ 40-тан астам шаруа қожалығының қауіпсіздігін қамтамасыз етеді. Жалпы алғанда, нысан 736 тұрғын үй мен 2000-нан астам адам тұратын аумақты қорғауға бағытталған.

Бекет заманауи талаптарға сай жабдықталған және төмендегідей ресурстарға ие:

• Жеке құрам мен техника: 1 арнайы өрт сөндіру автокөлігі, 1 жүргізуші және 2 кәсіби қызметкер;

• Байланыс жүйесі: 2 тасымалды, 1 стационарлық және 1 мобильді радиостанция;

• Инфрақұрылым: Ауылдық округ аумағында өрт сөндіру жұмыстарына қажетті 35 өрт гидранты орнатылған.

Бекеттің қызмет көрсету аймағында әлеуметтік маңызы бар нысандар — дәрігерлік амбулатория, мектеп, балабақша және жергілікті әкімдік ғимараттары орналасқан.

Облыс әкімі Берік Уәли өз сөзінде Мемлекет басшысы Қасым-Жомарт Тоқаевтың құтқарушылар мамандығына деген жоғары құрметін тілге тиек етіп, аймақтағы азаматтық қорғау жүйесін нығайту жұмыстарына тоқталды: 

«2023-2026 жылдар аралығында облыстық бюджеттен 3 миллиард теңгеден астам қаржы бөлініп, материалдық-техникалық база айтарлықтай нығайтылды. Бүгін ашылып отырған Қызылкесік ауылындағы бекет — осы жүйелі жұмыстың нақты нәтижесі», — деді аймақ басшысы.

Шара барысында сала үздіктері марапатталды. Төтенше жағдайлар министрі Шыңғыс Әрінов «НС-ЕРТАЛ» ЖШС директоры Ернар Набиоллаевқа төсбелгі, ал жүргізуші-қызметкер Серікжан Әміровқа Министрліктің Грамотасын табыстады. Сондай-ақ, қарауыл бастығы Нұрболат Ербаев пен ауылдық округ әкімі Әділбек Қабдолов облыс әкімінің Алғыс хатымен марапатталды.

Абай облысындағы 326 елді мекеннің қауіпсіздігін арттыру мақсатында жыл соңына дейін тағы 12 осындай бекет ашу жоспарланып отыр.