Тілді текетірес пен ерегестің қаруына айналдыру бізге әбүйір әпермейді – Ермұрат Бапи

2026 жылғы 4 ақпанда Мәжілістің жалпы отырысында конституциялық реформа талқыланды. Осы жиында бірмандатты округтен сайланған депутат Ермұрат Бапи тіл мәселесіне қатысты көзқарасын білдірді.

"Ең алдымен, елдегі конституциялық реформаны талқылау жөніндегі менің ұсынысымды Мәжілістің спикері ретінде күн тәртібіне енгізген шешіміңіз үшін азаматтық алғыс айтамын! Расында, осындай орасан өзгеріске қатысты мемлекеттік өкілетті органның трибунасынан сөз айтпай, ресми ретте үндемей қалуымызға болмайтын еді. Бұл ертеңгі күні сізге де, бізге де сын боларлық мәселе деп білем!" – деп бастады сөзін Бапи.

Депутаттың айтуынша, жаңа Конституция жобасына айтылып жатқан пікірлердің бір бөлігі тіл тақырыбы төңірегінде өрбіп отыр. Ол ұлттық сезім мен талаптың орынды екенін мойындай отырып, тіл арқылы қоғамда қарсыластық туғызу дұрыс еместігін атап өтті.

«Үлес салмағы 70 пайыздан асқан халық өзінің тілін өзгеге өктемдікпен емес, сары майға ыстық қасық батырғандай байыппен таңа білу – дәл бүгін әлдеқайда ұтымды айла болар еді. Тілді текетірес пен ерегестің қаруына айналдыру бізге әбүйір әпермейді. Өзінің тілін өктемдікпен тықпалаған имансыз идеялар пайда болған заманда, есермен егесу – естінің ісі болмайды», – деді Ермұрат Бапи.

Оның сөзінше, қазіргі халықаралық ахуал күрделі кезеңді бастан өткеріп жатқанда, Қазақстан үшін ең бастысы – ішкі тұрақтылық пен қоғамдық келісімді сақтау. Сондықтан тіл мәселесінде эмоцияға ерік бермей, байыпты ұстаным қажет екенін айтты.

Депутат Мемлекет басшысы Қасым-Жомарт Тоқаевтың Ұлттық құрылтайда айтқан сөзін де еске алып, ұлт мүддесін желеу етіп, ел ішіне іріткі салатын әрекеттерге жол бермеу керектігін атап өтті.

«Ұлт мүддесін желеу етіп, бос айқайға басатын, одан қалды азаматтарымыздың отанымызға деген шынайы сүйіспеншілігін саяси ұпай жинауға пайдаланғысы келетін теріс пиғылды адамдардың бізге қажеті жоқ», - деген еді мемлекет басшысы», – деп президенттің сөзін еске салды депутат.

Ермұрат Бапидің пікірінше, конституциялық реформаның басты мақсаты – мемлекеттің қауіпсіздігі мен егемендігін күшейту. Осы жолда қоғам мен билік арасында сабырлы, ашық әрі сындарлы диалог орнауы тиіс.