TikTok-тағы «экстрасенс»: Астанада TikTok арқылы 5,5 млн теңге жымқырған

Елордалық прокуратураның хабарлауынша, Астана қаласының соты өзін экстрасенс ретінде таныстырып, азаматтарды ірі көлемде тақырға отырғызған тұрғынға қатысты шешім қабылдады.

Ер адам TikTok әлеуметтік желісінде өзінің бойында «тылсым күш» пен «емшілік қасиет» бар екенін айтып, ақылы негізде магиялық қызметтер ұсынған.

Тергеу барысында анықталғандай, алаяқ желіде денсаулығына шағымданған әйелді тауып алып, оны «сиқырлы күштің көмегімен жазып жіберемін» деп сендірген. Осылайша ол үш бірдей зардап шегушінің сеніміне кіріп, олардан жалпы сомасы 5,5 миллион теңгеден астам қаражат жымқырған. Анықталғандай «емші» бұл ақшаны өз қажетіне емес, букмекерлік кеңселерде бәс тігуге жұмсап жіберген.

Сот отырысында айыпталушы өз кінәсін толықтай мойындап, келтірілген шығынның бір бөлігін өтеді. Дегенмен, сот істің мән-жайын ескере отырып, оны 2 жыл 4 ай мерзімге бас бостандығынан айыру туралы үкім шығарды. Қазіргі таңда сот шешімі заңды күшіне енді.