$ 469.52 € 553.75 ₽ 6.15

The Guardian нұсқасы бойынша Дастан Сәтпаев әлемнің ең үздік 60 жас футболшысының қатарына енді

Абдрахманов Мағжан
15 қазан 2025, 17:55
The Guardian нұсқасы бойынша Дастан Сәтпаев әлемнің ең үздік 60 жас футболшысының қатарына енді Сурет авторы: "Қайрат" футбол клубы

Британдық The Guardian газеті әлемнің ең талантты жас футболшыларының тізімін жариялады. Басылым 2008 жылы туған ең үздік 60 ойыншыны атады. Олардың ішінде «Қайрат» клубы мен Қазақстан құрамасының шабуылшысы Дастан Сәтпаев та бар. Ол рейтингте 30-орынды иеленді.

The Guardian Сәтпаевты «Қайраттың ең жарқын жұлдызы» деп атап, оның ойынын жоғары бағалады. Басылымның жазуынша, футболшы биыл команданы Чемпиондар лигасының топтық кезеңіне шығаруға үлес қосқан.

«“Челси” Сәтпаевты 4 миллион еуроға сатып алғанына қуануы керек. Сарапшылар оның трансферлік құны алдағы уақытта айтарлықтай өседі деп болжап отыр. Ол жылдамдығы мен техникасын шебер үйлестіре алады, ал ойын кезінде жасына қарамастан салмақты шешім қабылдай біледі. Жас ойыншы 2026 жылдың тамызында “Стэмфорд Бриджге” келген соң, АПЛ-де өзін дәлелдеуді көздеп отыр», – деп жазады The Guardian.

Рейтингте бірінші орында Аргентина құрамасының 17 жастағы шабуылшысы Томас де Мартис тұр. Ол «Ланус» клубының ойыншысы және Аргентина U17 құрамасы сапында 13 матчта 11 гол соққан.

Тізімге сондай-ақ «Барселона», «Боруссия», «Бавария» және «Пари Сен-Жермен» секілді әлемнің үздік клубтарының жас таланттары да енген.

#Дастан Сәтбаев #Дастан Сәтпаев #Футбол #Футболшы #Қазақстан футбол құрамасы #Қайрат ФК #The Guardian

Соңғы жаңалықтар