«Терроризмді қолдады»: Ресейде қазақстандық студент 2 жылға сотталды

Санкт-Петербург қаласында Санкт-Петербург мемлекеттік университетінің магистратура студенті, Қазақстан азаматы Гарри Азарян екі жылға колония-қонысқа сотталды. Бұл туралы ресейлік «Медиазона» басылымы хабарлады.

Биыл қаңтар айында жарты жылдан астам уақыт қамауда болған Азарянға бұлтартпау шарасы жеңілдетіліп, белгілі бір әрекеттерге тыйым салу шартымен босатылған. Басылым дерегінше, студент кінәсін мойындап, істі ерекше тәртіппен қарауды сұраған. Прокуратура оған үш жыл бас бостандығынан айыру жазасын сұраған.

Тергеу нұсқасына сәйкес, Азарян Ресейде билікті күшпен басып алуды және жаппай кісі өлтіруді «жария түрде ақтады» деген күдікке ілінген. Айыптаулар «Жұмысшы билік» ұйымының ашық кездесулерінде айтылған сөздердің стенограммаларына негізделген. Бұл материалдар Google Drive платформасына жүктеліп, өңдеуге ашық болғаны айтылады.

Азарянның анасы, Қарағанды қаласының тұрғыны Юлия Кучеренко Власть басылымына айыптаудың дәлелдік базасына күмән келтіретінін айтқан. Оның сөзінше, аталған жиындар жасырын ұйым емес, ашық пікірталас алаңы болған. Кездесулерге шақырулар ұйымның телеграм-арнасында жарияланып отырған.

Өткен жылдың мамырында бұлтартпау шарасын таңдау кезінде Азарян сотта өзін кінәлі санамайтынын және кінәсіздігін дәлелдеуге дайын екенін мәлімдеген.

Ресейлік DOXA басылымының хабарлауынша, осы іс аясында «Жұмысшы билік» ұйымының тағы бес қатысушысы ұсталған.

Азарянға Ресей Қылмыстық кодексінің 205.2-бабы – терроризмді ақтау айыбы тағылған.