"Терісі жыртылып, сүйегі көрініп тұр": Түркістан облысында бес жасар қызды ит қапты

Түркістан облысы Сауран ауданындағы Ескі Иқан ауылында ит 5 жастағы қызды қауып алып, оның бетіне ауыр жарақат салды. Бұл туралы Otyrar басылымы хабарлады.

Баланың анасы Дилафруз Халикованың айтуынша, қызы туыстарының үйінде ойнап жүрген кезде ит кенеттен тап берген. Жарақат алған қыз жедел түрде ауруханаға жеткізілген. Анасының айтуынша, қызының көзінің астындағы терісі жыртылып, сүйегі көрініп тұр.

Дәрігерлердің мәліметінше, ит баланың бетінің оң жағын қатты зақымдаған. Оған ота жасалғанымен, тыртықтар қалатыны айтылды. Сонымен қатар бала қатты шошынып, басынан жарақат алған. Қазіргі уақытта оның жағдайы тұрақты, ем қабылдап жатыр.

Оқиғадан кейін туыстары итті табуға тырысқанымен, нәтиже болмаған. Ауыл тұрғындары бұл өңірде ит шабуылы алғаш рет болып отырмағанын айтады.

Сауран аудандық әкімдігі жағдайдан хабардар екенін мәлімдеді. Ауыл шаруашылығы бөлімі басшысы Ербол Ғасырдың айтуынша, бір оқиға бойынша ит ұсталып, зертханаға жіберілген. Ал Ескі Иқандағы жағдай бойынша жануар мен оның иесін іздеу жұмыстары жүргізіліп жатыр.

Әкімдік мәліметінше, ауданда иттерді аулау және ұстауға 6,5 млн теңге бөлінген. Жыл басынан бері шамамен 50 ит ұсталған, оның ішінде 20-дан астамы бұралқы ит.