Теңгенің әлсіреуіне әсер еткен негізгі үш фактор аталды

Қазақстан үкіметі мен Ұлттық банк валюталық нарықтағы тұрақтылықты сақтау үшін бірлескен шараларды қолға алды. Бұл туралы дүйсенбі күні өткен брифингте Премьер-Министрдің орынбасары – Ұлттық экономика министрі Нұрлан Байбазаров мәлімдеді.

«Соңғы апталарда ұлттық валютаның әлсіреуіне байланысты валюталық нарықта белгілі бір ауытқулар байқалады. Азаматтар мен кәсіпкерлердің алаңдаушылығын түсіне отырып, үкімет пен Ұлттық банк келісілген шараларды жүзеге асырып жатыр», – деді Байбазаров.

Министр теңге бағамының өзгеруін тек сыртқы іргелі факторлардың әсерімен түсіндірді.

• Бірінші фактор – соңғы айларда жаһандық доллар индексінің күшеюі.
• Екінші фактор – әлемдік мұнай бағасының төмендеуі.
• Үшінші фактор – ресей рублінің әлсіреуі.

«Ресей – Қазақстанның ірі сауда серіктесі болғандықтан, рубльдің құбылуы теңге бағамына әсер етуі мүмкін», – деп түсіндірді министр.

Оның айтуынша, басты міндет – азаматтардың әл-ауқатын төмендетпеу және кәсіпкерлерге теріс әсерді азайту.

Министрдің айтуынша, мемлекет әлеуметтік міндеттемелерін толық көлемде орындауды жалғастырады. 2025 жылдың 1 қаңтарынан бастап:

• ынтымақты зейнетақы 8,5%-ға,
• әлеуметтік жәрдемақылар мен базалық зейнетақы 6,5%-ға көтеріледі.

2025 жылға арналған республикалық бюджетте 42 түрлі әлеуметтік төлемге 6 трлн теңгеден астам қаражат қарастырылған.

Инфляцияны тежеу үшін ішкі нарықты тауарлармен қамтамасыз ету, бәсекелестікті қорғау және тарифтерді реттеу шаралары жалғасады. Әлеуметтік маңызы бар азық-түлік бағасын тұрақтандыру үшін үкімет азық-түлік қорларын пайдалануды көздеп отыр.

«Жаңа егіннің азық-түлік қоры қалыптасқан, қысқы және көктемгі кезеңде бағаның күрт өсуіне жол бермеу үшін ақпан айында көкөністерді резервтен шығару басталады», – деді Байбазаров.

Үкімет жағдайды қадағалап, қажет болған жағдайда қосымша шаралар қабылдайтынын мәлімдеді.