Telegram әр қолданушының аккаунтын жеке веб-сайтқа айналдырмақ

Танымал Telegram мессенджері пайдаланушылардың профильдерін толыққанды веб-сайттарға айналдыратын ауқымды бастаманы қолға алды. Компанияның негізін қалаушы Павел Дуровтың мәлімдеуінше, мессенджер .gram деп аталатын меншікті домендік аймақты құруға ресми өтінім берген.

Егер бұл өтінімді Домендік есімдер мен IP-мекенжайларды басқару корпорациясы (ICANN) мақұлдаса, әрбір пайдаланушы өзінің Telegram-дағы атымен байланысты екінші деңгейдегі жеке доменге ие бола алады.

«Мысалы, @durov аккаунты durov.gram, ал @monk пайдаланушысы monk.gram доменін алады. Қолданушылар Telegram платформасында орналасатын интерактивті веб-сайттарды бар-жоғы бір хабарлама жіберу арқылы-ақ жасай алатын болады», - деп жазды Павел Дуров өзінің арнасында.

Осылайша, мессенджердегі әдеттегі никнейм тек адамды табудың тәсілі ғана емес, ғаламтордағы жеке веб-мекенжайына айналуы мүмкін.

Еске сала кетейік, бұған дейін Павел Дуров Астанада өткен жасанды интеллект бойынша халықаралық олимпиаданың (IOAI 2026) жеңімпаздарына 106,5 мың АҚШ доллары көлеміндегі сыйақыны табыстаудың жолын іздестіріп жатқаны хабарланған еді.