Тегін дәрі-дәрмектерді сатқан ұйымдарға миллиондаған айыппұл салынды

Қазақстанда халыққа тегін берілуі тиіс дәрі-дәрмектерді заңсыз сатқан 60-тан астам медициналық ұйым мен дәріхана әкімшілік жауапкершілікке тартылды. Бұл туралы Денсаулық сақтау министрлігі Медициналық және фармацевтикалық бақылау комитетінің төрағасы Бауыржан Джусипов мәлімдеді.

Заң бұзушылық деректері цифрлық таңбалау жүйесін енгізу нәтижесінде анықталған. Мониторинг барысында аталған жүйе дәріхана желілері арқылы тегін беруге арналған 26 мыңнан астам препарат қаптамасының сатылғанын тіркеді. Осыдан кейін уәкілетті органдардың мамандары 106 медициналық ұйым мен дәріханаға тексеру жүргізген.

"Қолданыстағы заңнаманы бұзғаны үшін салынған айыппұлдардың жалпы сомасы 20 миллион теңгеден асты. Алдын ала есептеулер бойынша мемлекетке келтірілген шығын көлемі 36 миллион теңгеден асып жығылады. Жиналған материалдар тиісті баға беру және процестік шешім қабылдау үшін құқық қорғау органдарына жолданды", – деді Бауыржан Джусипов.

Айта кету керек, шілде айында Денсаулық сақтау министрлігі соңғы екі жылда цифрлық таңбалау жүйесінің көмегімен тегін берілетін дәрі-дәрмектерді дәріханаларда қайта сатудың 25 мыңнан астам жағдайы анықталғанын хабарлаған болатын.

Фармацевтикалық нарықтағы ашықтықты қамтамасыз ету мақсатында қыркүйек айынан бастап цифрлық таңбалау жүйесі биологиялық белсенді қоспаларға (ББҚ) да қолданыла бастады. Ал 2027 жылы бұл талапты барлық медициналық бұйымдарға тарату жоспарланып отыр.