«Таза Қазақстан»: Түркістанның жасыл белдеуі бір күнде 2200-ден астам жаңа ағашпен толықты

Мемлекет басшысы Қасым-Жомарт Тоқаевтың бастамасымен қолға алынған «Таза Қазақстан» экологиялық бағдарламасы аясында Түркістан қаласында ауқымды ағаш егу науқаны өтті. Экологиялық мәдениетті арттыруды көздеген іс-шараға Түркістан облысының әкімі Нұралхан Көшеров, мемлекеттік орган өкілдері, қоғам белсенділері мен қала тұрғындары қатысты.

Өңір басшысы Нұралхан Көшеров акция барысында табиғат жанашырларымен бірге көшет егіп, тазалық пен көгалдандыру жұмыстары науқандық сипаттан тұрақты өмір салтына айналуы тиіс екенін атап өтті.

 «Егер күнделікті өмірде тазалықты сақтап, ағаш егуді әдетке айналдырсақ, бұл бастама өз жемісін береді», – деді облыс әкімі.

Бір күндік эко-акцияның нәтижесінде Түркістанға кіреберіс аумақтағы жасыл белдеуге 1200 түп Қырым қарағайы мен 1000 түп жапырақты ағаш егілді. Жалпы саны 2200-ден астам жас көшет егілген бұл аймақ алдағы уақытта қаланың экологиялық ахуалын жақсартатын саялы баққа айналмақ.

Айта кетейік, Түркістан облысында жасыл желек аумағын ұлғайту бойынша жүйелі жұмыстар жүргізілуде. 2021-2025 жылдарға арналған жоспар аясында өңірдегі 800-ден астам елді мекенде 3,6 миллион ағаш егу көзделсе, оның 1 миллионы дәл осы «Таза Қазақстан» бағдарламасы аясында биыл егіледі. Облыстағы көгалдандыру жұмыстары бекітілген кестеге сәйкес жалғасатын болады.