«Таза Қазақстан»: Семейлік ерікті жастар қоршаған ортаны қорғауға үлес қосуда

Семей қаласында «Таза Қазақстан» жалпыұлттық бағдарламасы аясында кезекті экологиялық науқан өтті. Бұл жолғы шараның негізгі мақсаты – қаланың санитарлық жағдайын жақсарту ғана емес, тұрғындар арасында «тазалық әр адамның өзінен басталады» деген экологиялық мәдениетті тереңдету.

Экологиялық акцияның негізгі нүктесі ретінде қала тұрғындарының сүйікті демалыс орны – Бейбітшілік аралы таңдалды. Тазалық жұмыстарына жоғары оқу орындарының студенттері мен еріктілерден құралған 50-ге жуық белсенді жас қатысты.

Жастар аумақты тұрмыстық қалдықтардан толық тазартып, демалыс орындарын ретке келтірді. Жиналған қоқыстың барлығы арнайы техникамен қала сыртындағы полигондарға жеткізілді. Ұйымдастырушылардың сөзінше, мұндай шаралар қоғамның табиғатқа деген жауапкершілігін арттыруда маңызды рөл атқарады.

Сенбілікке қатысушы студент Айхан Аханов бұл бастаманың тәрбиелік мәніне тоқталды:

«Әрбір жас үшін мұндай акцияларға қатысу - азаматтық парыз. Тазалық - адамның ішкі мәдениетінің айнасы. Егер әркім өз ауласын, өз қаласын таза ұстаса, қоршаған ортаны қорғау ортақ іске айналады», - деді ол.

Айта кетейік, өңірде сәуір айының басынан бері санитарлық-экологиялық екі айлық қарқынды жүріп жатыр:

• Алғашқы сенбіліктерге 15 мыңнан астам адам қатысты;

• 1000-нан астам мекеме мен жүздеген техника жұмылдырылды;

• Нәтижесінде полигондарға 1857 тонна қатты тұрмыстық қалдық шығарылды.

Сонымен қатар цифрлық кеңістікте де белсенділік байқалады. Әлеуметтік желілерде эко-белсенділер мен блогерлердің қатысуымен «Өзіңнен баста» челленджі жалғасуда. Бұл бастама «Таза Қазақстан» бағдарламасының негізгі идеясын - табиғатқа жанашырлықпен қарауды кеңінен насихаттап келеді.