«Таза Қазақстан»: Астанада экологияны қорғау мен еңбекті дәріптеген сенбілік өтті

Астанада «Хабар» агенттігі мен «Астана Тазалық» ЖШС бірлесіп ұйымдастырған кең ауқымды сенбілік өтті. Іс-шара республикалық «Таза Қазақстан» акциясының аясында, сондай-ақ Жұмысшы мамандықтар жылы мен «Хабар» агенттігінің 30 жылдық мерейтойына орай өткізілді.

Бұл күннің маңызды оқиғаларының бірі — екі ұйым арасында ынтымақтастық туралы Меморандумға қол қойылуы болды. Құжат қоғамда экологиялық мәдениетті қалыптастыруға, әлеуметтік жауапкершілік деңгейін арттыруға және табиғатқа жанашырлықпен қарау құндылықтарын насихаттауға бағытталған.

Хабар» агенттігінің басқарма төрағасы Кемелбек Ойшыбаев акцияның мәні мен маңызына ерекше тоқталды: «Табиғатты қорғау – бұл енді таңдау емес, азаматтық борыш. «Хабар» Агенттігі елордамызды көгалдандыруға нақты үлес қосуда. Біз жай ғана ағаш отырғызып жатқан жоқпыз – біз болашаққа деген үмітті тамырландырудамыз. Агенттіктің 30 жылдығын осындай игі іспен бастау – ел мен халыққа қызмет етуге деген адалдығымыздың дәлелі».

Ұйымдастырушылардың мәліметінше, «Таза Қазақстан» акциясы басталғалы бері ел көлемінде 4,5 миллионнан астам көшет отырғызылып, 1,5 миллион тоннадан астам қоқыс жиналды. Акцияға 4 миллионнан астам қазақстандық қатысты.

Іс-шара барысында жұмысшы мамандықтарының, соның ішінде коммуналдық және экологиялық қызметкерлердің рөліне де ерекше көңіл бөлінді. Күн сайын қала көшелерінің тазалығын қамтамасыз етіп жүрген жандардың еңбегі көп жағдайда көзге көріне бермейді, дегенмен олардың маңызы орасан.

Астанадағы көшелердің тазалығын қамтамасыз ететін басты ұйымдардың бірі — «Астана Тазалық» ЖШС. Бүгінде компанияда 2000-нан астам қызметкер жұмыс істейді, ал олардың иелігінде 500-ден астам арнайы техника бар.

ТОО бас директоры Замир Сағынов қалада атқарылып жатқан экологиялық жұмыстар туралы айтты:

«Биыл Астанада миллионнан астам жасыл желек отырғызу жоспарланған. Бұл — қаланың сәні ғана емес, келешек ұрпаққа қалдырар аманат. Қазіргі заман адамы табиғатпен үйлесімді өмір сүруді үйренуі керек. Бұл — уақыт талабы», — деді ол.

Сенбілік аясында қатысушылар елорданың бір саябағында 100 ағаш — 50 жөке мен 50 тау жаңғағын отырғызды. Сондай-ақ аумақты тазарту жұмыстары жүргізіліп, сенбілік экологиялық флешмобпен және тақырыптық викторинамен жалғасты. Белсенділер өз білімдерін сынап, естелік сыйлықтарға ие болды.