Таяу Шығыстан қайта алмай жатқан қазақстандықтар Тоқаевтан көмек сұрады

Таяу Шығыс елдерінен елге орала алмай қалған қазақстандықтар Президент Қасым-Жомарт Тоқаевқа көмек сұрап үндеу жасады. Бұл туралы KazTAG агенттігі хабарлады.

Басылым жариялаған бейнеүндеуде шетелде қалып қойған азаматтар бірнеше күннен бері қиын жағдайда отырғанын айтады.

– Біз Президент Қасым-Жомарт Тоқаевқа үндеу жасаймыз. Біз, қазақстандықтар, бірнеше күн Дубайдағы қонақүйде болдық. Кейін бізді Оманға алып келді. Біраз уақыттан кейін ұшаққа отырғызамыз деп уәде берді. Жеті-сегіз сағат жол жүрдік. Арамызда қарт адамдар, мүмкіндігі шектеулі азаматтар, кішкентай балалар бар. Алайда кеше бері тек бір ғана ұшақ ұшты. Барлық жаңалықтарда Дубай мен Оманда ұшақтар ұшып жатыр деп айтады, бірақ бұл шындыққа жанаспайды. Кеше бері бір ғана ұшақ ұшты. Біз осында жатырмыз. Ешқандай жағдай жасалмаған. Балалар ауырып жатыр, қарттар қиналып отыр. Өтінеміз, бізге көмектесіңіздер, – дейді бейнеүндеуде сөйлеген әйел.

KazTAG мәліметінше, үндеу жасаған әйелдің жанында бір топ қазақстандық болған. Олардың арасында егде жастағы адамдар, балалар және мүгедектер арбасындағы азамат та бар.

Бұған дейін қазақстандық Air Astana әуе компаниясы туристерді елге қайтару үшін тұрақты рейстер тек 10 наурыздан кейін басталатынын, ал билет сатылымы 17 наурызға дейін тоқтатылғанын хабарлаған еді.

Осы ақпараттан кейін Таяу Шығыс елдерінде қалған қазақстандықтар рейстер қайта ашылғанға дейін не істеу керектігін сұрай бастады.

– Неліктен Қазақстанның мемлекеттік органдары өз азаматтарын шұғыл эвакуациялау үшін нақты шаралар қабылдамайды? Неге адамдар тәулік бойы әуежайда еденде ұйықтауға мәжбүр? – дейді өңірде қалып қойған қазақстандықтардың бірі.

Материал жарияланған сәтте Қазақстан Сыртқы істер министрлігінің баспасөз қызметінен түсініктеме алу мүмкін болмаған.

Бұған дейін министрлік соңғы бірнеше күн ішінде Таяу Шығыс елдерінен Қазақстанға 3,3 мың азамат қайтарылғанын хабарлаған еді.