Таяу Шығыстағы шиеленіс: Қазақстан мұнайы қымбаттай бастады

Таяу Шығыстағы геосаяси шиеленіс аясында шикізат тапшылығы күшейіп, Қазақстан мұнайының бағасы айтарлықтай өсті.

Reuters агенттігінің дерегінше, қазақстандық CPC Blend пен әзербайжандық Azeri BTC мұнайы осы айда күрт қымбаттаған. Бұған дейін бұл мұнай сұрыптары Жерорта теңізі мен Еуропа нарығына жақын болғандықтан негізінен сол бағытта экспортталып келген.

Трейдерлердің мәліметінше, наурыз–сәуір айларына арналған CPC Blend партиялары өткен аптада Brent маркалы мұнайдан барреліне 1–2 доллар жоғары бағамен сатылған. Ал бұған дейін керісінше, шамамен 5 долларға дейін жеңілдікпен ұсынылып келген еді.

Соған қарамастан, CPC Blend экспорты тұрақсыз күйде қалып отыр. Сарапшылар бұған бірнеше фактор әсер ететінін айтады:

• қолайсыз ауа райы,

• дрон шабуылдары,

• Теңіз кен орнындағы өндірістік мәселелер.

Саладағы дереккөздердің бірі CPC Blend-ті Жерорта теңізіндегі мұнай өңдеушілер үшін негізгі шикізаттың бірі екенін, алайда жеткізілімнің жиі үзіліске ұшырайтынын атап өткен.

Сарапшылардың болжамынша, Каспий аймағынан жеткізілетін мұнай жақын уақытта қымбат деңгейде қала беруі мүмкін. Алайда баға геосаяси жағдайға байланысты құбылып отырады.

Айта кетейік, CPC Blend – Теңіз, Қашаған және Қарашығанақ кен орындарында өндірілетін мұнай. Ол Каспий құбыр консорциумы арқылы әлемдік нарыққа шығарылады. Бұған дейін консорциум инфрақұрылымдарына бірнеше рет дрон шабуылдары жасалған.

Сондай-ақ өткен жылдың қарашасында Новороссийскідегі КҚК терминалына жасалған шабуылдан кейін Қазақстанда желтоқсан айында мұнай өндірісі шамамен 6%-ға төмендегені хабарланған болатын.