Таяу Шығыстағы шиеленіс: Ираннан 109 қазақстандық эвакуацияланды

Қазақстан Сыртқы істер министрлігі Таяу Шығыстағы шиеленіске байланысты Иран аумағынан 109 азамат эвакуацияланғанын хабарлады.

Министрліктің мәліметінше, эвакуация достас мемлекеттер арқылы транзитпен ұйымдастырылған. Атап айтқанда, 89 адам Ираннан Түрікменстан арқылы, ал 20 адам Әзербайжан арқылы елге шыққан.

«Таяу Шығыстағы жағдайдың күрт ушығуына байланысты Қазақстан Республикасы Иран Ислам Республикасының аумағындағы азаматтарын жедел эвакуациялады. Бұл – Сыртқы істер министрлігі, мемлекеттік органдар мен шетелдегі дипломатиялық өкілдіктер арасындағы үйлесімді жұмыстың және жоғары деңгейдегі өзара іс-қимылдың нәтижесі», – делінген СІМ хабарламасында.

Эвакуацияланған азаматтарға консулдық-құқықтық көмек көрсетіліп, елге оралуға барлық жағдай жасалды.

Сыртқы істер министрлігі Иран, Түрікменстан және Әзербайжан билігіне көрсеткен қолдауы үшін алғыс білдірді.

Таяу Шығыстағы қақтығыс 13 маусымға қараған түні Израильдің Иран аумағына соққы беруінен кейін ушыға түсті. 16 маусымда СІМ ресми өкілі Айбек Смадияров Иранда – 132, Израильде – 219 қазақстандық азамат бар екенін мәлімдеген.