Тасмағамбетовтің орнына кім келетіні белгілі болды

2025 жылдың 1 қаңтарынан бастап Ұжымдық қауіпсіздік туралы шарт ұйымының (ҰҚШҰ) бас хатшысы ауысады. Қазіргі бас хатшы, қазақстандық Иманғали Тасмағамбетовтің орнына бұл қызметке Қырғызстан өкілі Таалатбек Масадықов тағайындалмақ. Бұл туралы Ресей президентінің көмекшісі Юрий Ушаков мәлімдеді, деп хабарлады ТАСС.

«Бішкекте өтетін ҰҚШҰ кеңесінің 27 қарашадағы сессиясына Иманғали Тасмағамбетов қатысады. Ол 1 қаңтардан бастап өз қызметін аяқтайды. Оның орнына ұйымның бас хатшысының орынбасары, Қырғызстан өкілі Таалатбек Масадықов тағайындалады», – деді Ушаков.

Ресейлік дипломаттың айтуынша, кадрлық ауысу ұйым жұмысының сабақтастығын қамтамасыз етеді. Тасмағамбетов саммит барысында халықаралық және аймақтық қауіпсіздік мәселелері жөнінде баяндама жасайды, сондай-ақ оған ҰҚШҰ-ның бірінші дәрежелі құрмет белгісі табысталады.

Иманғали Тасмағамбетов Қазақстанда ұзақ жылдар бойы жоғары мемлекеттік лауазымдар атқарған: ол елорда мен Алматы қалаларының әкімі, премьер-министр, қорғаныс министрі және Ресейдегі елші болған. 2023 жылдан бері ҰҚШҰ бас хатшысы қызметін атқарып келеді.

Тасмағамбетовтің ҰҚШҰ-дағы кейбір мәлімдемелері Қазақстанда сынға ұшыраған. Мәселен, ол биыл наурыз айында Еуропа елдері Украинада әскерін орналастырса, ҰҚШҰ Ресейге көмек көрсетуге дайын екенін мәлімдеген. Бұл сөздер қазақстандық қоғамда «елді соғысқа тарту қаупі» деп бағаланған.

Ал жаңа бас хатшы Таалатбек Масадықов – қырғыз дипломаты, халықаралық қатынастар жөніндегі сарапшы. Ол БҰҰ-да 12 жыл жұмыс істеген, 2022 жылы Қырғызстан президентінің арнайы өкілі, ал 2024 жылдан бері ҰҚШҰ бас хатшысының орынбасары қызметін атқарып келген.

ҰҚШҰ құрамына Қазақстан, Ресей, Беларусь, Қырғызстан және Тәжікстан кіреді. Армения былтыр ұйымдағы мүшелігін уақытша тоқтатқанымен, әлі ресми түрде шыққан жоқ.