Таразда әйел екі баласын терезеден лақтырып жіберген

Жамбыл облысында екі кәмелетке толмаған баланы терезеден лақтырды деген күдікпен әйел адам ұсталды. Бұл туралы өңірлік полиция департаментінің баспасөз қызметі хабарлады.

Алдын ала мәліметке сәйкес, күдікті балалардың анасы болуы мүмкін. Аталған дерек бойынша сотқа дейінгі тергеу басталды.

Полицияның мәлімдеуінше, әйел ұсталып, уақытша ұстау изоляторына қамалған. Ал 2021 және 2023 жылы туған екі бала шұғыл түрде ауруханаға жеткізілген. Қазіргі уақытта қажетті тергеу амалдары жүргізіліп жатыр.

Денсаулық сақтау басқармасының ақпаратынша, балаларға жабық бас-ми жарақаты мен ми ісінуі диагнозы қойылған. Үлкен баланың сан сүйегі сынып, сүйек орнына түспей ығысқан.

Дәрігерлер екі балаға да бас миының, кеуде қуысының, жамбас сүйектерінің компьютерлік томографиясын, сондай-ақ лапароцентез (іш қуысындағы артық сұйықтықты алу) жүргізген. Бұдан бөлек, ми ісінуіне қарсы ем-дом тағайындалған.

Медициналық мекеменің мәліметінше, үлкен балаға сан сүйегіне операция жасау жоспарланып отыр. Балалардың жағдайы дәрігерлердің тұрақты бақылауында.

Оқиғаның барлық мән-жайын құқық қорғау органдары анықтап жатыр.