Танымал Wedrink сусындары қауіпті ме: Денсаулық сақтау министрлігі мәлімдеме жасады

Қазақстанда танымал Wedrink брендінің сусындарынан жаппай тамақтан улану оқиғалары тіркелген жоқ, деп хабарлады ҚР Денсаулық сақтау министрлігінің Санитариялық-эпидемиологиялық бақылау комитеті SHYNDYK.KZ редакциясының ресми сауалына берген жауабында. Ведомство өкілдері аймақтардағы инфекциялық стационарлармен бірлесіп, улану жағдайларына арнайы талдау жүргізген. Тексеріс қорытындысы бойынша аталған бренд өнімдерімен байланысты ешқандай улану фактісі анықталмаған.

Сонымен қатар комитетке және оның аумақтық департаменттеріне азаматтар тарапынан Wedrink өнімдеріне қатысты шағымдар мен ресми өтініштер түспеген. Дегенмен ведомство мамандары мұндай сусындардың құрамында қант мөлшері жоғары қою шәрбаттар (сироптар) бар екенін, сондықтан оны шамадан тыс тұтыну денсаулыққа кері әсер етуі мүмкін екенін ескертеді.

Санитарлық-эпидемиологиялық бақылау комитетінің мәлімдеуінше, мұндай өнімдерді көп мөлшерде пайдалану асқазанда ауырлық тудырып, қандағы қант деңгейінің көтерілуіне ықпал етеді. Дәрігерлер бұл сусындарды әсіресе балалар мен жасөспірімдердің жиі тұтынуына кеңес бермейді.

Егер азаматтар тарапынан аталған өнімдерден улану немесе денсаулықтың нашарлауы сияқты нақты расталған жағдайлар орын алса, ресми медициналық құжаттар мен тиісті материалдарды қоса отырып, аумақтық бөлімшелерге жүгіну қажет. Осы өтініштер негізінде кәсіпкерлік нысанына жоспардан тыс тексеру жүргізілмек.