Тамыздың 24-інен бастап YouTube-тегі қаралымдар мүлде басқаша есептеледі

Әлемдегі ең ірі видеохостинг YouTube платформасы қаралымдарды есептеу алгоритміне соңғы жылдардағы ең ауқымды өзгерісті енгізіп жатыр. Тамыз айының 24-інен бастап видеоның қаралымы ол қосылған сәттен, ең алғашқы кадрдан бастап-ақ есептеле беретін болады, деп хабарлайды Vietnam vn.

Бұған дейін платформада бір қаралым саналу үшін пайдаланушы видеоны кемінде 30 секунд қарауы тиіс еді. Енді жаңа ережеге сәйкес, бұл шектеу толығымен жойылады. Мұндай жүйе толықформатты видеолар мен тікелей эфирлерге қолданылмақ. Тікелей трансляцияда қаралым қолданушы эфирге қосылған бойда жазылады.

Бұл әдіс YouTube Shorts форматында 2025 жылдың наурызынан бері қолданылып келеді. Сондай-ақ TikTok және Instagram желілері де қаралымды дәл осылай видео қосылған сәттен бастап есептейді (ал X желісінде кемінде 2 секунд қарау керек).

Бұл өзгеріс блогерлерге қалай әсер етеді?

Сарапшылардың айтуынша, жаңа ереже әсіресе көрерменді қысқа уақыт қана ұстап тұратын контенттердің қаралымын тез өсіруге мүмкіндік береді. Нәтижесінде, видеоның аудиторияны қамту көрсеткіші бұрынғыдан өзгеше көрінетін болады. Мұнымен қоса, YouTube өкілдері бұл жаңашылдық авторлардың табысына және Монетизация бағдарламасына (YPP) ешқандай кері әсер етпейтінін хабарлады.

Айта кету керек, бұған дейін YouTube монетизацияға қосылғысы келетін жаңа авторларға қойылатын талаптарды күшейткен болатын. Келесі жылдан бастап платформадан жарнама арқылы табыс табу үшін соңғы 12 айда кемінде 8 000 сағат қаралым немесе 90 күн ішінде қысқа видеолардан (Shorts) 20 миллион қаралым жинау қажет болады.