Табиғатқа жанашырлық – ортақ міндет: Түркістанда «Taza Qazaqstan» аясында бір күнде 20 мың ағаш егілді

Түркістан облысында «Taza Qazaqstan» жалпыұлттық бағдарламасы аясында кең ауқымды экологиялық акция өтті. Іс-шара Мемлекет басшысы Қасым-Жомарт Тоқаевтың бастамасын қолдау мақсатында ұйымдастырылып, «Ақсу-Жабағылы» мемлекеттік табиғи қорығының 100 жылдығына арналды.

Акция барысында Мемлекет басшысының қатысуымен телекөпір ұйымдастырылып, өңірлер арасында тікелей байланыс орнатылды. Онлайн кездесуде облыс әкімі Нұралхан Көшеров өңірдегі экологиялық жұмыстар туралы баяндады.

Өңірде бағдарлама аясында 2 миллионнан астам ағаш отырғызылған. Сонымен қатар 400-ге жуық арнайы техника сатып алынып, елді мекендердің санитарлық жағдайы жақсартылуда. Инфрақұрылым бағытында 11 саябақ, 8 сквер және 4 аллея пайдалануға берілген. Ал «Мөлдір бұлақ» акциясы аясында 155 бұлақ пен 77 өзен тазартылған.

Аталған акция шеңберінде облыстың барлық аудан, қалаларында бір күнде 20 мың түп ағаш егілді. Іс-шараға 340 техника жұмылдырылып, 350 тонна қоқыс шығарылды, нәтижесінде 17 мың гектар аумақ тазартылды. Сонымен қатар 2026 жылы 1 миллионнан астам ағаш отырғызу жоспарланып отыр.

Негізгі іс-шара өткен «Ақсу-Жабағылы» қорығында 2 мыңнан астам адам қатысып, 1000 түп көшет егілді.

Айта кетейік, 1926 жылы құрылған «Ақсу-Жабағылы» қорығы – Қазақстандағы тұңғыш табиғи қорық. Оның аумағы 131 мың гектардан асады. Қорықта 1300-ден астам өсімдік түрі өседі және қар барысы, арқар, сілеусін, қоңыр аю сияқты сирек жануарлар мекендейді. Сонымен қатар ЮНЕСКО-ның биосфералық резерваттар тізіміне енгізілген.