Суперкубок–2026: «Тобыл» – төрт дүркін чемпион

28 ақпан күні Астана төріндегі аренада Қазақстан Премьер-лигасының 2026 жылғы маусымы Суперкубок ойынымен басталды. Маусым шымылдығын түрген алғашқы кездесуде Қостанайдың «Тобыл» клубы мен Алматының «Қайрат» командасы өзара мықтыны анықтады.

Ойын алғашқы минуттардан-ақ жоғары қарқынмен өрбіді. Елордадағы суық ауа райына қарамастан, трибунадағы жанкүйерлердің қолдауы ерекше сезіліп, алаңдағы тартысқа айрықша серпін берді.

Есепті «Тобыл» сапынан Герра ашты. Араға көп уақыт салмай «Қайрат» ойыншысы Мрынский таразы басын теңестірді. Артынша Оксанен ресми матчтағы алғашқы голын соғып, есепті алматылықтардың пайдасына өзгертті. Бірінші тайм «Қайраттың» басымдығымен аяқталды – 2:1.

Екінші таймда тартыс тіпті күшейе түсті. Қостанайлық ұжым таразы басын теңестіруге бар күшін салса, алматылықтар есеп айырмасын ұлғайтуға ұмтылды. Алайда қос команда да қорғаныста сауатты ойнап, ұзақ уақыт қақпаларына гол жіберген жоқ.

Кездесудің соңына қарай «Тобыл» қауіпті айып добына ие болды. Стандартты соққыны Асхат Тағыберген орындап, допты алыс бұрышқа дәл бағыттады – 2:2. Осы сәттен кейін ойын жаңа қарқын алып, кездесу тағдыры пенальти сериясында шешілді.

Пенальтиде қостанайлықтардың қақпашысы Сұлтан Бусурманов Рикардиньоның алғашқы соққысын қайтарып, командасына сенімділік сыйлады. Ал шешуші сәтте Дәурен Жұмат мүлт кетпей, матчтың соңғы нүктесін қойды.

Осылайша қостанайлық «Тобыл» өз тарихында төртінші мәрте Қазақстан Суперкубогінің жеңімпазы атанды.

Матч алдындағы баспасөз мәслихатында «Тобыл» клубының бас бапкері Нұрбол Жұмасқалиев «Қайраттың» оңай қарсылас еместігін атап өтіп, соған сай дайындық жүргізілгенін айтқан болатын. Ал ойыннан кейін «Қайрат» клубының бас бапкері Рафаэль Уразбахтин қарсыласын жеңісімен құттықтап, өз командасының ойынына көңілі толатынын және алдағы уақытта олқылықтармен жұмыс жүргізілетінін жеткізді.

Нуризат Муратбекқызы