Су тасқынынан зардап шеккен кәсіпкерлерге 2,2 млрд теңге төленді

Су тасқынынан зардап шеккен шағын және орта кәсіп субъектілері тарапынан 9,3 млрд теңге сомасына 455 өтінім келіп түскен. Оның ішінде 374 өтінім (82,1%) 5,8 млрд теңгеден астам сомаға мақұлданды, деп хабарлады Ұлттық экономика министрлігі.

Соның ішінде 222 өтінім бойынша кәсіпкерлерге 2,2 млрд теңге көлемінде төлем жасалды.

Ең көп мақұлданған: Атырау облысында 2,1 млрд теңгеге 215 өтінім, Батыс Қазақстан облысында 2,5 млрд теңгеге 40 өтінім, Солтүстік Қазақстан облысында 901,8 млн теңгеге 44 өтінім, Қостанай облысында 206 млн теңгеге 35 өтінім. Ал ең аз Ақтөбеде облысында 366 млн теңгеге 24 өтінім және Ақмола облысында 61,1 млн теңгеге 16 субъектінің өтінімі мақұлданған.

Қызмет түрлері бойынша негізінен сауда объектілері, қоғамдық тамақтану орындары, демалыс базалары мен қонақ үйлер және басқа секторларға зақым келген. 

Өтемақы туралы өтінімді өңірлік комиссия 5 жұмыс күні ішінде қарайды және қаржыландыру жеткілікті болған жағдайда 10 жұмыс күні ішінде төлем жүзеге асырылады.

Қалған өтінімдер бойынша кәсіпкерлерге төлемді тамыз айының соңына дейін аяқтау жоспарланған. Күрделі жөндеуді әрі реконструкциялауды қажет ететін объектілер бойынша қаражат сараптама және жобалық-сметалық құжаттаманы қабылдау қорытындылары бойынша аударылатын болады.