Starlink Қазақстанда ресми түрде іске қосылды

Бүгін, 13 тамыздан бастап, Қазақстан аумағында Starlink спутниктік интернеті ресми түрде қолжетімді болды. Бұл туралы Цифрлық даму, инновациялар және аэроғарыш өнеркәсібі министрлігі хабарлады.

Ведомствоның мәліметінше, енді еліміздің кез келген өңірінің тұрғындары SpaceX компаниясына тиесілі төмен орбиталы спутниктер желісі арқылы жоғары жылдамдықты әрі тұрақты интернетке қосыла алады. Starlink технологиясы шалғай және жолы қиын елдімекендерде де сенімді байланыс орнатып, халыққа заманауи цифрлық қызметтерді пайдалануға мүмкіндік береді.

Осыдан екі ай бұрын, 12 маусымда, министрлік пен Starlink компаниясы Қазақстан аумағында қызмет көрсету кезінде ұлттық заңнаманы сақтау жөнінде келісімге келген болатын.

Starlink ресми сайтындағы мәліметке сүйенсек, үйге арналған шексіз стационарлық интернет айына 23 мың және 31 мың теңге тұрады. Жол үстінде жұмыс істеуге арналған байланыс – 26 мың теңге (50 ГБ) және 52 мың теңге (шексіз). Ал бизнеске арналған тарифтер: 50 ГБ – 28 мың теңге, 500 ГБ – 72 мың теңге, 1 ТБ – 127 мың теңге, 2 ТБ – 237 мың теңге.

Қызметке қосылу үшін қажетті құрылғы бөлек сатып алынады, оның құны – 104 мың теңге.