Спортшылардың білім деңгейі төмен болады деп ойлайды - Ризабек Айтмұхан

Қазақстандық еркін күрестің жарқын өкілдерінің бірі, әлем чемпионы әрі үш дүркін Азия чемпионы Ризабек Айтмұхан соңғы жылдары халықаралық аренада тұрақты нәтижесімен көзге түсіп келеді. Жуырда ол халықаралық күрес қауымдастығы - United World Wrestling (UWW) нұсқасы бойынша мамыр айының үздік спортшысы атанды. Алматыда өткен Қазақстан кубогындағы жеңісі мен Вьетнамдағы Азия чемпионатындағы алтын жүлдесінен кейін біз балуанмен соңғы жетістіктері мен алдағы жоспарлары туралы әңгімелестік.

Ең алдымен, соңғы жеңістеріңізбен құттықтаймыз! Қазақстан кубогындағы жеңіс пен Азия чемпионатындағы алтыннан кейінгі әсеріңіз қандай? 125 келіге дейінгі салмақта белдесу қиын болған жоқ па?

Рақмет! Соңғы жеңістеріме шүкіршілік етемін. Биыл Қазақстан кубогының жеңімпазы атанып, үш дүркін Азия чемпионы болдым. 125 келі салмақта өнер көрсету аса үлкен қиындық тудырған жоқ. Дегенмен бұл салмақта бәсекелестік өте жоғары, мықты қарсыластар көп. Сондықтан ешқашан босаңсуға болмайды. Жалпы, бәрі ойдағыдай өтті.

Жуырда америкалық Real American Freestyle (RAF) лигасында белдесіп қайттыңыз. Бұл жарыс сізге қандай әсер қалдырды?

Әрине, RAF мен үшін ерекше тәжірибе болды. Бұл – деңгейі өте жоғары америкалық лига. Мұхиттың арғы бетінде өнер көрсету мен үшін үлкен абырой. Осындай мықты балуандар бақ сынайтын додада күресудің өзі үлкен тәжірибе береді. Алдағы уақытта осы лигада чемпион атанғым келеді.

Сіз тек бозкілемде ғана емес, әлеуметтік желілерде де белсендісіз. Қазіргі спортшы үшін нәтиже көрсетумен қатар жастарға үлгі болу қаншалықты маңызды?

Әрине, спортшы әрқашан тәртіпті болып, сауатты сөйлей білуі керек. Кейбір адамдар спортшылардың білім деңгейі төмен болады деп ойлайды. Меніңше, бұл – қате түсінік. Қазіргі спортшы тек жарыста жеңіске жетіп қана қоймай, қоғам алдында өзін дұрыс ұстап, жастарға жақсы үлгі көрсете білуі қажет.

Фото инстаграм парақшасынан: rr1azbek

Биылғы маусымда жоғары нәтижелерімен көзге түскен Ризабек Айтмұхан халықаралық аренада Қазақстанның намысын абыроймен қорғап келеді. Алда спортшылар үшін ең басты мақсаттардың бірі – 2028 Summer Olympics. Жас балуанның да көздеген межесі – осы дүбірлі додада ел сенімін ақтап, Олимпиада тұғырына көтерілу.

Нуризат Муратбекқызы