Созақ ауданында Астана күні қарсаңында 25 отбасы жаңа пәтерге ие болды

Түркістан облысының Созақ ауданында Астана күні мерекесіне орай әлеуметтік маңызы бар қуанышты оқиға өтті. Шолаққорған ауылындағы Жеткіншек мөлтек ауданында 25 отбасыға су жаңа пәтерлердің кілттері салтанатты түрде табысталды, деп хабарлайды Түркістан облысы әкімінің баспасөз қызметі.

Тұрғын үймен қамтамасыз етілгендер қатарында көпбалалы отбасылар мен халықтың әлеуметтік осал топтарына жататын азаматтар бар. Мерекелік іс-шараға жергілікті тұрғындар, еңбек ардагерлері, қоғам өкілдері мен жаңа қоныс иелері қатысты.

Салтанатты жиында сөз алған Созақ ауданының әкімі Мұхит Тұрысбеков мемлекет тарапынан халықтың тұрмыс сапасын арттыруға басымдық беріліп отырғанын атап өтті:

«Мемлекет басшысының тапсырмасына сәйкес ауданымызда тұрғын үй құрылысының қарқыны сақталып отыр. Баспана – әрбір шаңырақтың берекесі мен тұрақтылығының негізі. Бүгінгі шара – тұрғындарды әлеуметтік қолдау бағытындағы жүйелі жұмыстардың нәтижесі. Бұл бағыттағы игі бастамалар алдағы уақытта да өз жалғасын табады», – деді аудан басшысы.

Аудандық мәслихат төрағасы Ордабек Жәмиев те тұрғындарды куанышымен құттықтап, ізгі тілегін білдірді. Өз кезегінде жаңа пәтер иелері мемлекеттік қолдауға ризашылықтарын жеткізді.

Айта кету керек, азаматтарды баспанамен қамтамасыз ету заңнама талаптарына сәйкес «Отбасы банк» АҚ-ның бірыңғай ақпараттық жүйесі арқылы жүзеге асырылады. Пәтерлер кезектің орны мен азаматтардың мұқтаждық деңгейіне қарай бөлінеді.

Жеткіншек мөлтек ауданында құрылыс жұмыстары белсенді жүріп жатыр:

• Алдыңғы нәтижелер: Таяуда Мемлекеттік рәміздер күніне орай 29 отбасы жаңа пәтер алған болатын;

• Дайын тұрғын үйлер: Қазіргі таңда пайдалануға дайын 22 пәтердің құжаттары рәсімделуде, олар да кезең-кезеңімен беріледі;

• Жаңа нысандар: Ауданда 20 пәтерлі тұрғын үйлердің құрылысы жалғасуда;

«Қазатомөнеркәсіп» ҰАК» АҚ еншілес ұйымдарының қолдауымен жаңғырту бағдарламасы аясында 16 пәтерлі екі қабатты тұрғын үйлер бой көтеруде.