Сот “Biz Birgemiz Qazaqstan 2030” қорын таратты

Астана қаласының мамандандырылған ауданаралық экономикалық соты Әділет департаментінің бұл бірлестікті тарату туралы талабын қанағаттандырды. 

Іс материалдарына сәйкес, аталған заңды тұлға 2021 жылғы 11 қазанда мемлекеттік тіркеуден өткен. Бірлестіктің құрылтайшыларының саны – 10 адам, олардың қатарында Перизат Қайрат та бар. Құрылтай жиналыстарының хаттамаларында олардың есімдері көрсетілген.

Тергеу барысында жүргізілген қолжазба сараптамасының қорытындысы бойынша, 10 құрылтайшының 9-ының атынан құрылтай құжаттарына Қайрат Перизаттың өзі қол қойғаны анықталды.

Сондай-ақ, Перизат Қайрат көктемгі су тасқынынан зардап шеккен азаматтарға және Палестина тұрғындарына гуманитарлық көмек ретінде жиналған 1,7 миллиард теңгеден астам қаражатты жымқырды деген күдікке ілінді.