Соңғы екі жылда Қазақстанда халықаралық іздеуде болған 27 "қылмыс әлемінің серкесі" ұсталды

Ішкі істер министрлігінің ресми мәліметінше, соңғы екі жылда халықаралық іздеуде жүрген ұйымдасқан қылмыстық топтардың (ҰҚТ) 27 мүшесі ұсталды.  

ҰҚТ-ның қызметімен байланысты 120-дан астам қылмыстық іс ашылып, оның 13-і трансұлттық сипатқа ие болған. Қылмыс әлемінің 600-ден астам өкілі жауапкершілікке тартылды.  

Ел аумағында жақын шетелден келген алты «заңдағы ұрының» әрекеті тоқтатылды. Сондай-ақ 160 қылмыстық топтың ауыр қылмыстар мен бопсалауға қатысы бар заңсыз әрекеттері жойылды.  

Сонымен қатар бопсалау деректері бойынша 1,3 мыңнан астам қылмыстық іс қозғалып, адам саудасымен байланысты 400-ден астам қылмыс анықталды.  

Министрлік ұйымдасқан қылмыстық топтармен күресті қатаң әрі принципті түрде жалғастыратынын мәлімдеді.