Соңғы екі аптада үш қайғылы оқиға: Тараз бен Шу әкімдері қатаң сөгіс алды

Жамбыл облысының әкімі Ербол Қарашөкеев балалар мен жасөспірімдер арасындағы құқық бұзушылықтың көбеюіне байланысты шұғыл кеңес өткізді. Бұл туралы өңір әкімінің баспасөз қызметі хабарлады.

Әкімнің айтуынша, жаңа оқу жылы басталғалы бері кәмелетке толмағандар арасында аса ауыр қылмыстардың тіркелуі жағдайдың ушығып бара жатқанын көрсетеді. Соңғы екі аптада үш қайғылы оқиға орын алған.

"Балалардың қауіпсіздігі мен тәрбиесі, алаңсыз білім алуы – біздің басты міндетіміз. Бірақ соңғы жағдайлар қабылданып жатқан шаралардың тиімсіз екенін көрсетіп отыр. Мектеп, ата-ана және қоғам арасындағы өзара жұмысты қайта қарау қажет", – деді Ербол Қарашөкеев.

Өңір басшысы бұған дейін де нақты тапсырмалар бергенін, алайда тиісті нәтижені көрмегенін атап өтті. Осыған байланысты бірқатар лауазымды тұлғаларға тәртіптік шара қолданылды.

Тәртіптік жазаға іліккендер:

• облыс әкімінің орынбасары Серік Сәлемов – «сөгіс»;

• Тараз қаласының әкімі Бақытжан Орынбеков, Шу ауданының әкімі Бақытжан Жәнібеков, білім басқармасының басшысы Нұрбек Оршыбеков, Тараз қаласы әкімінің орынбасары Ұлана Сламбекова, Шу ауданы әкімінің орынбасары Найман Сұлтанбаев – «қатаң сөгіс».

Сонымен қатар білім басқармасына Тараз қалалық және Шу аудандық білім бөлімдерінің басшыларының қызметіне сәйкестігін қарастыру тапсырылды. Әр ауылдық округке жеке учаскелік полиция инспекторы қажет екені айтылып, бос штаттарды жедел толықтыру міндеттелді.

Облыс әкімі арнайы зерделеу тобын құруды тапсырды. Бұл топ барлық мектептің жоғары сынып оқушылары мен колледж студенттері арасында құқықтық сауаттылықты арттыруға, қылмыстың салдары мен зардабын түсіндіруге бағытталмақ.

Еске салсақ, 13 қыркүйекте Жамбыл облысында оқушы жарақат алып, жедел жәрдем келгенше көз жұмған. Бұдан бөлек, жуырда Тараздағы мектеп-интернатта қыз балаға зорлық жасалғаны туралы ақпарат тараған. Сондай-ақ Талас ауданында кәмелетке толмағандар өгей әкесінің өздерін мәжбүрлі жұмысқа жеккенін және соққыға жыққанын айтып, видеоүндеу жариялаған еді.