«Собачий кайф»: Ақтауда тағы бір оқушы қауіпті ойын кезінде ауыр жарақат алып қалды

Ақтауда 12 жасар оқушы балалар арасында таралып кеткен қауіпті ойын кезінде есінен танып, жерге құлап, басын ұрып алған. Бұл туралы Lada.kz хабарлады.

Оқиға 18 мамыр күні кешке 32В ықшам ауданындағы балалар алаңында болған. «Собачий кайф» деп аталатын ойында жасөспірімдер бір-бірін тыныссыз қалдырып, есінен тануға дейін жеткізеді. Сол сәтте баланың есі шығып, жерге құлап, басын қатты соққан. Оқиғадан кейін оның денесі тырысып-құрысып қалған.

Куәгерлер баланың есін жиғызуға тырысып баққанымен, ол көп уақытқа дейін өз-өзіне келе алмаған. Жедел жәрдем қызметі оны облыстық балалар көпбейінді ауруханасына жеткізген.

Дәрігерлер баланың ми шайқалу диагнозымен жарақат бөлімшесіне жатқызылғанын мәлімдеді. Қазіргі таңда оның жағдайы тұрақты деп бағаланып отыр.