СҚО тұрғыны Украинадағы соғысқа қатысқаны үшін сотталды

Солтүстік Қазақстан облысында Бугровое ауылының тұрғынына шетелдегі қарулы қақтығысқа қатысқаны үшін үкім шығарылды. Сот қаулысы Сот кабинеті порталында жарияланған.

Іс материалдарына сәйкес, 2025 жылдың ақпан айының басында ер адам Ресейге жұмыс іздеп барған. Мәскеуде пойыз ауыстыруды күтіп жүргенде соғысқа еріктілерді тартумен айналысқан адамдармен танысқан. Кейін Новый Уренгой қаласына барып, Ресейдің қарулы күштеріне ерікті түрде қосылған. Волонтерлер оны Нижний Новгородқа жеткізіп, құжаттарын рәсімдеген. Ақпан айының ортасында ол Ресей Қорғаныс министрлігімен бір жылдық келісімшартқа отырып, шабуылшы-сапер ретінде қызмет атқарған.

Ростов облысындағы оқу орнында дайындықтан өткеннен кейін ол Луганскке, одан әрі Бахмут қаласына жіберілген. Сот қаулысында 2025 жылғы 30 сәуірде Клещеевка елді мекені маңында жауынгерлік тапсырма орындау кезінде миналы-жарылыс жарақатын алғаны көрсетілген. 1–5 мамыр аралығында госпитальда емделіп, кейін жарақатына байланысты демалыс алған. Шілде айының басында ол әскери бөлімді өз бетінше тастап, Қазақстанға оралған.

Сотталушы қарулы қақтығысқа қатысқанын жоққа шығармаған. Қорғаушысы оның бала кезінен жеңіл дәрежедегі ақыл-ой кемістігі болғанын алға тартқанымен, сот оның диспансерлік есепте тұрмағанын анықтады. Сараптама қорытындысы интеллектуалдық деңгейінде тек жеңіл төмендеу бар екенін көрсетті.

Сот ер адамды 6 жылға бас бостандығынан айырды. Ол жазасын қауіпсіздігі орташа мекемеде өтейді. Сонымен қатар 1 071 теңге көлеміндегі сараптама шығындарын және Жәбірленушілерге өтемақы қорына 78 640 теңге төлеуге міндеттелді.