СҚО ауылынан цифрлық серпіліс: Тимирязевте Creative IT Center ашылды

Солтүстік Қазақстан облысының Тимирязев ауылында цифрлық дағдыларды дамытуға арналған Creative IT Center өз жұмысын бастады. Орталықтың ашылуы Қазақстанда Цифрландыру және жасанды интеллект жылы деп жарияланған 2026 жылдың басымен тұспа-тұс келіп, мемлекеттік цифрлық саясаттың шалғай ауылдарға дейін жетіп отырғанын көрсетті.

Creative IT Center цифрлық сауаттылықты арттыруға, IT-құзыреттер мен жасанды интеллект бағытындағы бастамаларды қолдауға арналған заманауи кеңістік ретінде жұмыс істейді. Бұл бастама Мемлекет басшысы Қасым-Жомарт Тоқаев айқындаған елді жаңғырту бағытының өңірлерде нақты іске асып жатқанын дәлелдейді.

Орталықтың ашылу салтанатына жергілікті атқарушы органдар, білім беру мекемелері, бизнес өкілдері, қоғамдық ұйымдар, мектеп оқушылары мен белсенді жастар қатысты. Іс-шара барысында Солтүстік Қазақстан облысы әкімі аппаратының басшысы Руслан Әлішев ауылдық жерде цифрлық инфрақұрылым қалыптастырудың маңызын атап өтті. Оның айтуынша, егде жастағы тұрғындардың электрондық қызметтерді пайдалануында қиындықтар бар, ал мұндай орталықтар бұл олқылықтың орнын толтыруға мүмкіндік береді.

Creative IT Center өңірдегі жүйелі жұмыстың бір бөлігі саналады. Жоспарға сәйкес, 2026 жылғы 1 наурызға дейін Солтүстік Қазақстан облысының барлық аудандарында IT-орталықтар ашылмақ. Тимирязевтегі орталық — жоспарланған 13 орталықтың жетіншісі әрі биыл ашылған алғашқысы.

Іс-шарада жергілікті жастардың жобалары да таныстырылды. Соның ішінде 11-сынып оқушысы Даниил Степаненко әзірлеген ауыл мектептеріне арналған SABAQ білім беру платформасы көпшіліктің назарын аударды. Жоба интернеті әлсіз немесе жоқ елді мекендерде офлайн оқу мүмкіндігін ұсынады.

Орталық аға буын, студенттер мен кәсіпкерлер үшін де ашық. Мұнда электрондық мемлекеттік қызметтерді пайдалану, телемедицина, цифрлық сервистер, сондай-ақ ауыл шаруашылығына қажетті жоғары технологиялармен жұмыс істеу дағдылары үйретіледі.

Жобаны ұйымдастырушылардың айтуынша, Creative IT Center болашақта ауылдық жерде цифрлық мамандарды даярлайтын, ұрпақтар арасын байланыстыратын және жасанды интеллект мүмкіндіктерін кеңінен қолданатын маңызды алаңға айналмақ.