СҚО әкімі су тасқыны жағдайын әуеден бағалады

Бүгін Солтүстік Қазақстан облысының әкімі Ғауез Нұрмұхамбетов су тасқыны қаупі бар аудандардың жағдайын бағалау мақсатында аэровизуалды мониторинг жүргізді. Ұшу бағыты Есіл өзені бойымен өтіп, Шал Ақын, Ғабит Мүсірепов, Айыртау және Тимирязев аудандарын, сондай-ақ Шағалалы өзені мен Шағалалы су қоймасын қамтыды. Сонымен қатар, Тайынша, Ақжар және Уәлиханов аудандарының да жағдайы бақыланды.

СҚО Төтенше жағдайлар департаментінің бастығы Жомарт Аскаров, Тайынша ауданының әкімі Берік Әлжанов және Ғ. Мүсірепов ауданының әкімі Руслан Анбаев қазіргі су тасқыны жағдайы туралы баяндама жасады.

“Ауа температурасының тұрақты түрде жоғарылауына байланысты қардың басым бөлігі еріп кетті. Дегенмен, кейбір аудандарда еріген қар суынан туындайтын қауіп әлі де сақталуда. Өзендерде мұз кептелісі жоқ, алдын алу мақсатында жару жұмыстары жүргізілді. Сонымен қатар, кейбір автомобиль жолдарында уақытша су тасу жағдайлары тіркелді”, – деп жазды өңір басшысы әлеуметтік желідегі парақшасында.

Есіл өзені арқылы келетін су ерекше қауіп төндіріп тұр. Сергеев су торабында судың асып төгілуі 81 см-ге жетіп, біртіндеп көтерілуде. 2024 жылғы рекордтық көрсеткіш – 425 см болған. Жағдай жергілікті биліктің тұрақты бақылауында.

Мемлекеттік органдар мен барлық қызметтер тәулік бойы жұмыс істеп, су тасқыны салдарын азайту және елді мекендерді қорғау бойынша барлық қажетті шараларды қабылдауда.